Гьуьрметлу инсанрикай
И мукьвара Кьасумхуьруьн ветеринарный лабораториядин духтур Ягъибегов Абдулманаф Абдулашимовичаз «Дагъустан Республикадин лайихлу ветеринарный духтур» тIвар гана. Шабагь адав Махачкъалада региондин Кьили вахкана.
— Цмуррин виридалайни чIехи девлет анай акъатай ва хуьре яшамиш жезвай инсанар я, — лугьузва хуьруьн администрациядин кьил Раида Алибеговади. — Чи хуьр тухумралди машгьур я. Абурукай яз, завай Шайдаеврин, Эфендиеврин, Мегьамедоврин, Ягъибеговрин ва масабурун тIварар дамахдивди кьаз жеда. Абурун баркаллу крар чи йикъара невейри давамарзава.
Ветеринарный духтур Абдулманаф Абдулашимович абурукай сад я. Адан буба Абдулашим Ягъибегова 30 йисалай виниз вахтунда районда маларин ва лапагрин духтурвиле, са шумуд йисуз Цмуррин хуьруьн Советдин председателвиле кIвалахна.
Абдулашимани 50 йисалай виниз хуьруьн майишатдин хиле намуслудаказ зегьмет чIугур Беневша Ягъибеговри 11 аял тербияламишна. Веледрикай алимар, муаллимар, юристар ва маса пешекарар хьанва.
— Буба ветдухтур яз, чи кIвале мал-къарадикай, абурун сагъламвал хуьникай мукьвал-мукьвал ихтилатар жедай. Чи хизандихъ калер, лапагар авай, — суьгьбетзава А. Ягъибегова. — Гьавиляй зун бубадин пешедал ашукь хьана. Ветеринарный духтурвилин кIвалахди зи руьгьдин игьтияжар таъминарзава.
1961-йисан 14-сентябрдиз дидедиз хьайи Абдулманафа Кьасумхуьруьн 1-нумрадин юкьван школада 8-класс, 1981-йисуз Махачкъалада хуьруьн майишатдин техникум акьалтIарна.
Ам Ставрополдин хуьруьн майишатдин институтдик экечIна. Зегьметдин рехъ 1989-йисуз Кьасумхуьруьн ветлабораториядин духтурвиле кIвалахунилай башламишна.
Гуьгъуьнлай пешекар СтIал Сулейманан райондин ветеринарно-санитарный дестедин начальниквиле тайинарна.
2002-йисалай ада Кьасумхуьруьн ветлабораториядин духтур яз кIвалахзава.
— Чи лабораторияди СтIал Сулейманан ва Мегьарамдхуьруьн районриз къуллугъзава, — лугьузва А. Ягъибегова. — Эхиримжи йисара кьве райондани мал-къарадин, лапагрин, кIвалин къушарин кьадар артух хьанва. Инвестпроектрай районра малдарвилел машгъул жезвай майишатар тешкилзава. И кIвалахри чак шадвални кутазва.
А. Ягъибеговахъ галаз ихтилатар ийидайла, за кьатIана хьи, ам пешедал рикI алай кас я. Чирвилер артухарун патал ада интернетдикай, махсус журналрикай менфят къачузва. Къенин девирди, датIана виликди физвай илимди, цIийивилери гьар са касдивай чирвилерин дережа артухарун истемишзава. Абдулманаф вичин хиве авай везифайрив гьа тегьерда эгечIзава.
— Абдулманаф Абдулашимовичакай завай анжах разивилин хуш келимаяр лугьуз жеда, — лугьузва райондин ветеринарный управленидин начальник Жамидин Мегьамедова. — Пешедал, гьайванрал рикI алай, везифаяр намуслудаказ кьилиз акъудзавай адаз чи коллективда ва агьалийрин патай гьуьрмет ава.
А. Ягъибегован яргъал йисарин намуслу зегьметдиз лайихлу къиметни ганва. Мукьвара гайи «Дагъустан Республикадин лайихлу ветеринарный духтур» гьуьрметдин тIварцIелай гъейри, адахъ республикадин ветеринариядин рекьяй Комитетдин пуд грамота, Россиядин хуьруьн майишатдин министерстводин Чухсагъулдин чар, райондин администрациядин ва ветуправленидин грамотаярни ава.
Хъсан пешекар хьиз, А. Ягъибегов, низамлу хизандин кьилни я. ДГУ-дин математикадин факультет акьалтIарай адан уьмуьрдин юлдаш Марина Магьмудовнади ЦIийи поселокдин юкьван школада кIвалахзава. Педагогвилин 37 йисан тежриба авай ам «Дагъустан Республикадин лайихлу муаллим», «Россиядин Федерациядин умуми образованидин гьуьрметлу работник» тIварарин, РД-дин илимдин ва образованидин министерстводин премиядин сагьиб я.
Абдулманаф Абдулашимовича ва Марина Магьмудовнади ферли 3 велед чIехи авуна. ДГУ акьалтIарнавай Таисади, юридический колледж куьтягьнавай Эльдара Москвада, политехнический институтда кIелай Марата (ам СВО-дин иштиракчи я) Махачкъалада кIвалахзава.
Чна Игит дидедин кьегьал хва Абдулманаф Ягъибеговаз гьуьрметдин тIвар гун мубаракзава, чаз адахъ кIвалахда мадни еке агалкьунар хьана кIанзава.
Хазран Кьасумов
