Къведай йисалай дяведин махсус серенжемдин иштиракчийривай Яшайишдин фондунин реабилитациядин центрайра, санаторийра ва курортра чпин сагъламвал гуьнгуьна хутаз жеда. Реабилитациядин центрайра 25 ва санаторийрани курортра йиса са сеферда 21 юкъуз.
Пландик квайвал, СВО-дин иштиракчийрилай гъейри, абурухъ гелкъвезвай ксаризни ихьтин мумкинвал жеда. Реабилитациядин центрайриз рекье тун патал абурун (СВО-дин иштиракчийрин, ветерандин) сагъламвилин гьакъиндай МСЭ-дин (медико-социальная экспертиза) делилар фикирда кьада. Эгер виликдай сагъламвал ахтармишнавачтIа ва инвалидвал тайинарнавачтIа, реабилитациядин центрада и серенжем кьилиз акъудда ва лазим куьмек гуда. СВО-да Россиядин Игитвилин тIварцIиз лайихлу хьайибуруз ва 1-группадин инвалидриз направление учир авачиз гуда. Эгер СВО-дин ветеран 1-группадин инвалид ятIа ва я медицинадин экспертизада адахъ гелкъведай кас хьунин игьтияж авайди къалурнаватIа, а касдин (яни гелкъвезвайдан) харжиярни Яшайишдин фондунин такьатрай жеда (реабилитациядин центрада чка, рекьин харжияр).
Яшайишдин фондунин малуматда мадни хабар гузвайвал, арзаяр Яшайишдин фондунин муьштерийрихъ галаз кIвалахзавай къуллугъра ва МФЦ-ра гуз жеда. Къведай йисан февралдилай — «Госкъуллугъар» порталдин куьмекдалдини. Гьар са арзадин гьакъиндай пешекарри кIвалахдин 2 йикъан къене къарар кьабулда ва арза ганвай кас хабардарда.
Россиядин Яшайишдин фондунин Дагъустанда авай отделенидин агьалийриз меслятар гудай центрадин алакъадин нумра дегиш хьанва. Виликдай кардик квай 8-800-00-03-39 нумради «кIвалахзамач». 9-декабрдилай Дагъустандин отделенини Россиядин Яшайишдин фондунин алакъадин сад тир къурулушдикай менфят къачунал элячIнава. Гила региондин агьалийривай, федеральный центрадин 8-800-100-00-01 нумрадиз зенгна, меслят къачуз жеда.
Чи мухбир
