Донбассдин мулкар Украинадин миллетбазрикай азад авунин махсус­ серенжем давам жезва. И баркаллу карда вишералди дагъустанвийри, кьегьалри хьиз, иштиракзава. Идан гьакъиндай цIипуд лагьай дагъус­танвидиз Россиядин Федерациядин Игит лагьай тIвар гуни шагьидвалзава. Дяведин махсус серенжемда иштиракиз физвай­ гуьгьуьллубурун кьадарни тIимил туш.

И йикъара Мегьарамдхуьруьн райондин администрациядин актив дяведин махсус серенжемдиз гуьгьуьллувилелди физвай Дагъустан Республикадин Халкьдин Собранидин депутат Гьуьсейханов­ Исламахъ галаз гуь­руьш­миш хьана. Адахъ галаз меркездай дуьньяда машгьур Дагъустандин кьуьлердай «Лезгинка» ансамблдин директор Жамбулат Мегьамедовни атанвай.

Сифте гаф рахуналди, райондин администрациядин кьил Фарид Агьмедова Ислам Гьуьсейхановакай куьруь малумат гана. 1999-йисуз международный террористрин бандайри Да­гъустандал вегьейла, Ислам Гьамзатовича абур терг авунин, чи республикадай чукурунин карда иштиракнай. Гилани ада, ватандашвилин кам къачуналди, масадбурузни чешне къалурзава. Ватан коллективный западдин гьужумрикай хвена кIанзавай вахтунда къерехда акъвазун адан намусди кьабулнач.

— Ислам Гьамзатовича датIана райондин уьмуьрдани иштиракзава, — лагьана Ф. Агьмедова. — Ругуд аялдин бубади чи райондин кIеве авай 850 хизандиз суваррин йикъара рикIел  ала­мукь­дай савкьатар гана, Мегьарамдхуьруьн коррекционный школа-ин­тернат герек ­тадаракралди таъми­нарна. Гьа са вахтунда депутатди СВО-да женг чIугвазвай ватанэгьлийри къуллугъзавай частариз герек техника, суьр­сет, партал рекье туна. Гила ам вич физва аниз гъалибвал патал женг чIугвазвай аскерриз юлдаш хьун патал.

«Ина секиндиз ацукьдалди, за гьана­ чи умуми кардиз гзаф куьмек гуда. Зун къе гьана герек я, гьавиляй за гьахьтин къарарни кьабулна», — лагьана Ислам Гьуь­сейханова.

Фарид Агьмедова райондин ви­ри­ агьалийрин тIварцIихъай депутат­диз сагъ­рай лагьана ва Ислам Гьуь­сейхановав­ «Мегьарамдхуьруьн райондин гьуьрметлу агьа­ли» лагьай лишан вахкана.

Хийир Эмиров