Лутувал авунай шак физва
И мукьвара Махачкъаладин полицейскийри кьилиз акъудай серенжемрин нетижада мад са лутувал дуьздал акъудна. И лутувал автомобиль маса къачунихъ галаз алакъалуди я.
Тайинарнавайвал, Махачкъала шегьердин 26 йисан яшда авай агьалиди вахт-вахтунда яваш-яваш гьакъи агакьарунин къайдада машин къачунин багьнадалди 41 йисан яшда авай чкадин агьалидин «Mercedes-Е500» машин вичиз къачуна.
Лутувилиз рехъ гунай шак физвай агьали полициядин отделдиз хкана. Адан гафаралди, 1 миллионни 200 агъзур манатдин къимет авай машин ада гьасятда пуд лагьай касдиз маса хгана, арадал атай пул лагьайтIа, вичин рикIиз кIанивал серфна.
Жегьилдин гьерекатрик РФ-дин УК-дин 159-статьяда (лутувал) къалурнавай тахсиркарвилерин лишанар ква.
Мефедрон вахчуна
Дагъустандин МВД-дин къуллугъчийри Махачкъаладин 37 йисан яшда авай агьалидивай 5 килограммдилай гзаф мефедрон вахчуна. Идакай РД-дин МВД-дин пресс-къуллугъди хабар гузва.
Къайдаяр хуьдай органрин са шумуд управленидин къуллугъчийри санал тадиз кьабулай серенжемрин нетижада Шамхал поселокдин патав 37 йисан яшда авай агьалиди вичин «Honda Elysion» автомобиль туна. Полицейскийри машиндай жагъай пластикдин 3 путулка вахчуна. Экспертизади къалурайвал, путулкайра 5 килограммдилай виниз заланвал авай мефедрон авай.
Малум хьайивал, машиндин сагьибди наркотик гележегда маса гун патал хуьзвай.
И делилдай силис тухун давам жезва.
«Лезги газет»
