Тамариндикай итижлу делилар
. Дуьньядал ихьтин гьайван алайдакай гзафбуруз малум тахьун мумкин я. И гъвечIи гьайван игрунка маймунрин килфетдик акатзава. Адан ватан Кьиблепатан Америка я. Винел патан акунар, къати рангар себеб яз, садра акурбурун рикIел и маймунар аламукьда. Тамарин дуьньядал алай лап гъвечIи маймунрин жергедай я. Адакай чаз бязи итижлу делилар жагъана.
. И маймундин заланвал тахминан 0,3 килограммдикай ибарат я.
. И вагьшидиз чуру квай императорский тамарин лугьузва. Ахтармишай са пешекарди и гьайвандинни монархдин акунар сад-садав гекъигна ва гуьгъуьнлай ихьтин тIвар гана. Гьакъикъатдани, чIехи маймунрилай алакь тийизвай кьакьан чкайриз тамаринар хкаж жезва.
. Тамариндихъ хци къармахар ава, абурун куьмекдалди ада тарарин хилер мягькемдиз кьазва.
. Маса вагьшийрикай хуьн патал и маймунар гапIалралди яшамиш жезва.
. Тамаринар чилел саки эвичIзавач. Абур къалин тарарин хилера чуьнуьх жезва.
. Са сятда 38 километрдиз чукуриз жедай йигинвал ава и гьайванрихъ.
. Тамаринар 10-20 йисуз яшамиш жезва.
. И маймунар вири затIар недай гьайванрик акатзава. Амма тамаринри гзафни-гзаф тарарал экъечIзавай гьар жуьре емишар незва.
. ЧIехи пай тамаринрин вилериз анжах кьве ранг аквазва.
. Тамариндин тум бедендилай яргъи я. Адан куьмекдалди гьайванри четин чкайрай емишар атIузва.
. Бедендиз гъвечIи гьайванар ятIани, тамаринар душмандихъ галаз женг чIугваз гьамиша гьазур я.
«Лезги газет»
