Школадиз къвезвай гьар са аялдин уьмуьрда сифтегьан классрин муаллим кьетIен кас я. Аял чIехи уьмуьрдиз гьихьтин чирвилерин парни эдебдин девлет гваз фидатIа, анжах гьа и муаллимдилай аслу жезва.

Михаил Калинина лагьайвал, муаллимди виридалайни жавабдар везифа кьилиз акъудзава. Чи школайра ихьтин муаллимар гзаф ава. Абурукай сад Белиж поселокдин М. Ярагъидин тIварцIихъ галай сад лагьай юкьван мектебда вичин рикI алай пешедин иеси, сифтегьан классрин муаллим Ибремпашаева Зенфира я.

Зенфира 1953-йисуз СтIал Сулей­манан райондин Курхуьре «Самурский» совхозда рабочкомвиле кIва­­лахай Къаиманни кIвалин кайвани Халисадин хизанда дидедиз хьана. Абурун хизанда ирид аял авай: кьве гада­ни вад руш. Хуьруьн школада 9-класс агалкьунралди куьтягьай Зенфира­ 1969-йисуз Дербентдин педучи­ли­­ще­дик экечIна. Училищеда кIел­замаз, 1971-йисуз ам кьисметди Белиждиз акъудна. Училище акьалтIарай 1973-йисуз адакай винидихъ тIвар кьур мектебда сифтегьан классрин муаллим хьана.

Сифте йикъалай ада вич жавабдарвал гьиссзавай инсан яз къалурна. КIвалахдин юлдашрин арада гьамиша мегьрибандиз, масадан хъсанвилихъ галайди, кIевелай алахъдайди яз тухвана.

Кьвед лагьай йисуз адав класс вугана. ИкI ада муьжуьд выпускдин аялриз чирвилер ва тербия гана. А вахтунда школадин директор рагьметлу Якьуб Гуьлалиева Зенфира муаллимдиз агалкьунрай Гьуьрметдин грамота  гана.

2000-йисуз Зенфира Къаимовна сифтегьан классрин завучвиле тайинарна.

— Зенфира Къаимовна, завуч гьихьтинди хьун лазим я? — хабар кьуна за.

— Дурумлу, къастунал кIеви, истемишдай, жувни, гьакI жуван къвалав гвай вирини тамамвилихъ агакьардайди, эдеблуди ва педагогвилин кар чидайди. Гьар жуьредин фикирар, хесетар авай инсанар идара авун, гьелбетда, четин кар я. Завуч гьамиша мектебда кьиле физвай вакъиайрин юкьва ава ва адан кьилин везифа гьар садан рикIин сим юзазвай къайда чирун, ам мектебдин уьмуьрдиз герек терефдихъ элкъуьрун я.

Завучвиле кIвалахай йисара Зенфира Къаимовнади тарсар гунин ва аялриз чирвилер хьунин еридал гуьзчивал тухвана. Завучвилин везифаяр ада 17 йисуз намуслувилелди кьилиз акъудна.

КIвалахда къазанмишнавай агалкьунрай 2010-йисуз Дербент райондин администрациядин кьили адан зегьмет Гьуьрметдин грамота гуналди къейдна. 2011-йисуз Зенфира муаллим «РФ-дин умуми образованидин гьуьрметлу работник» лагьай тIварцIиз лайихлу хьана. Ам са шумуд маса шабагьрин иесини я.

51 йисуз са мектебда муаллимвиле, сифтегьан классрин завучвиле кIвалахнавай ва гилани гьакъисагъдаказ зегьмет чIугун давамарзавай Зенфира муаллимдихъ еке тежриба ава. Алай вахтунда ам сифтегьан классриз лезги чIаланни литературадин тарсар гузвай му­аллим-насигьатчи я.

— Кьисметди зун Белиж по­селок­диз акъудайдалай инихъ за жуваз багъриди хьанвай гьа са мектебда кIвалахзава, — лугьузва ада. — Жуван  мектебда кIвалахдин юлдашрихъ галаз за образованидин хиле фейи са шумуд реформа кьилиз акъудуна иштиракна. Гьелбетда, абурукай бязибурухъ чпин хъсанвилерни, татугайвилерни авай. ГьакI ятIани, абуру мектебдин уьмуьрдиз цIийивални цицIивал, са гьихьтин ятIани юзун гъана. Гила мектебдин уьмуьрда МЭШ тваз алахънава. Эхь, уьмуьр чкадал акъвазнавач, фад-фад дегиш жезва. Умудзава хьи, цIийивилер хъсанбур жеда.

— За гила жуван жаванвилин йисарин дуст рушарин хтулриз тарсар гузва, — давамарзава Зенфира муаллимди. – Захъ галаз чи коллективда, поселокдин школайра ва Ватандин гьар са пипIе за тарсар гайи ученикри гьакъисагъвилелди зегьмет чIугвазва.

Ада къейд авурвал, адан выпускникри муаллимдихъ галаз алакъаяр хуьзва, суварар, хайи югъ мубаракзава. Зенфира муаллимдизни абур вичин веледар хьиз кIанда.

Эхиримжи ирид йисуз кьилин дережадин муаллим Зенфира Къаимовнади сифтегьан классра кIелзавай аялриз лезги чIаланни литературадин предметрай тарсар гузва.

Мектебдин директор Имара Заловади Зенфира Къаимовна хъсан муаллим, яратмишзавай инсан хьиз, гьакI вижевай насигьатчи тирдини къейдна. Ада аялрин алакьунар вилик тухузва, зегьмет кIан хьунин ва гьуьрмет авунин тербия гузва, кIелунрани яратмишунра кIелзавайбурук вердишвилер кутазва ва юлдашриз вичин тежрибадикай пай гузва.

Зегьмет кIани, вилик эцигай месэлаяр кьилиз акъуддай намуслу инсан Зенфира Къаимовнадиз неинки мектебдин юлдашрин, гьакI райондин ­муаллимрин арадани еке гьуьрмет ава.

Хизанда кьве гадани са руш тер­бия­ламишзава. Рустамни Ариф гъве­чIи карчияр я. Руша Дербентдин пед­кол­леджда кIелна, 1-нумрадин СОШ-да кIва­лахна. Кьисметди ам Дербентдиз акъудна. Гьамни гъвечIи карчивилел машгъул я. Зенфира муаллимдихъ ирид хтулни са птул ава. Хтулрикай Лейлади ва Софияди духтурар яз, Ибрагьима карчи яз Москвада кIвалахзава.

Къагьриман Ибрагьимов