17-27-октябрдин йикъара Кеферпатан Кавказдин федеральный округдин кьуд республикада (Дагъустан, Чечня, Ингушетия ва Кеферпатан Осетия-Алания) ирид лагьай сеферда Вирироссиядин волонтеррин «Дуствилин маякар. Кавказдин минараяр» проектдин мярекатар кьиле физва.
РД-дин милли сиясатдин ва динрин крарин рекьяй министерстводин гражданвилин обществодин институтрихъ галаз алакъаяр хуьзвай отделдин начальник Заур Уружева лагьайвал, проектдин кьилин макьсад волонтеррин кIвалахдин ва образованидин, культурадин идарайрин, тарихдин ивиррин куьмекдалди халкьарин арада дуствилин, ислягьвилин алакъаяр гегьеншарун ва мягькемарун я. Гьа гьисабдай яз, — Кавказдин чилерал кьиле фейи тарихдин вакъиаяр рикIел хуьн, абурукай чирвилер артухарун.
Важиблу проектдиз талукь вири мярекатар Кеферпатан Кавказдин культурадинни тарихдин ивиррихъ галаз алакъалу чкайра тешкилнавай. Волонтерар пуд дестедиз пайнава: «Дагъвияр» — Дагъустанда, «Лекьер» — Ингушетияда ва «Хванахваяр» — Кеферпатан Осетияда. ЦIи са цIийивални ава: проектда Донецкдин, Луганскдин республикайрин ва Запорожьедин жегьилрини иштиракзава. Гьар са десте культурадинни тарихдин объектрал менфятлу крарал машгъул жезва, абуру культурадинни савадлувилин мярекатрани иштиракзава, проект кьиле тухузвай чкайрин агьалийрихъ галаз гуьруьшар тешкилзава. Международный волонтеррин проектдин кьилин девиздикай рахайтIа, куьмек гун, чирвал артухарун, суьгьбетар авун, дуствал арадал гъун я.
Проектдин сергьятра аваз, экологиядин акцияр, мастер-классар ва экскурсияр тешкилнавай. Волонтерри чеб журналистар-блогерар, фотокорреспондентар, режиссерар язни ахтармишна. Заметкаяр, макъалаяр кхьена, репортажар гьазурна, шикилар яна, чпиз аквазвай крарикай гьар йикъан дневникра кхьинар авуна. Дагъустандин волонтеррин дестеди Шамиль районда кIвалахна.
Волонтеррин проектдин региондин «Дуствилин маякар. Дагъустан» отделенидин председатель, Махачкъала шегьердин 57-нумрадин А. Суханован тIварунихъ галай юкьван школадин директордин заместитель Хасбат Тилакаевади къейд авурвал, Дагъустандиз къвезвай десте Шамиль райондин тарихдин, культурадин имаратрихъ, минарайрихъ, агьалийрихъ галаз таниш хьана. Алатай йисарин тежрибади къалурайвал, Дагъустандиз къвез, Дагъларин уьлкведин адетрихъ, инсанрихъ ва фикир желбдай чкайрихъ галаз таниш жез кIанзавайбур гзаф ава.
Ада лагьайвал, Шамиль райондин администрация, культурадин, образованидин идарайрин коллективар хъсандиз гьазур хьанвай ва абуру Россиядин регионрай къвезвай мугьманар неинки хушвилелди кьабулна, абуруз кIвалахдай, ял ядай вири шартIар тешкилна. Идахъ галаз сад хьиз, волонтерриз Дербентдиз, Сулакдин дагьардал, Самурдин тамуз экскурсиярни тешкилна. Абур республикадин тIвар-ван авай инсанрихъ галаз гуьруьш хьана.
24-октябрдиз волонтеррин дестеяр Чечен Республикада кIватI хьана. Анай вири Ингушетиядиз фена. 26-октябрдиз Магас шегьерда проектдин кIвалахдин нетижаяр кьуна, жегьилри чпи гьазурнавай гъвечIи кинофильмаяр къалурна. Ана «Халкьарин арада дуствилин алакъаяр вилик тухунин карда жегьилрин роль» темадай элкъвей столни тешкилна. Эхирдай вирида «Дуствилин межлисда» иштиракна.
Хийир Эмиров
