И йикъара Докъузпара райондин кьил Абдурагьим Алискерова райондин экономикадин отделдин начальник Султанмурад Магьмудовахъ ва анин пешекаррихъ галаз райондин алишверишдин чкаяр ахтармишун патал махсус совещание кьиле тухванай. Анал Абдурагьим Алискерова администрацияди тешкилнавай комиссиядихъ галаз районда авай алишверишдин чкаяр ахтармишна, талукь документар къайдадик квачиз, а чкайра кIвалахзавай гражданар чирун патал Султанмурад Магьмудовал  тапшурмишна.

Комиссияди райондин Мискискарин, Усугъчай, ЦIийи Каракуьре хуьрерин алишверишдин чкаяр ахтармишна. Ахтармишунрай малум хьайивал, и хуьрерай 18 касди герек тир регистрациядин документар къайдадик квачиз кIвалахзавай. Администрацияди тешкилнавай комиссиядин дестедик и рекьяй хъсан кар чидай райондин ва республикадин тешкилатрин идарайрин руководителар, райондин экономикадин отделдин пешекарар, «Эренлардин сес» газетдин мухбир, полициядин работникар, хуьрерин администрацийрин кьилер  квай. Гуьзчивилин гьерекатрин эхирдай Султанмурад Магьмудова къейд авурвал, и рекьяй тухузвай гьерекатар чна генани давамарда ва  исятда райондин къене ихьтин алишверишдин чкайра кIвалахзавайбурухъ галазни икьрар  кутlунда.

«Лезги газет»