25-сентябрдиз 86-йисан яшда аваз бине Кьурагь райондин КIирийрин хуьряй тир государстводин ва общественный деятель Фатима Абдурагьмановна Эмирова рагьметдиз фена.
Фатима Абдурагьмановна 1938-йисуз нафтIадин мяденрин устIар, фяле Мегьамедов Абдурагьманан хизанда Дербент шегьерда дидедиз хьана. Ада шегьердин юкьван школа, Дагъустандин государстводин университет ва ахпа Москвада КПСС-дин ЦК-дин къвалав гвай партийный кьилин школа куьтягьна.
Зегьметдин рехъ жегьил пешекарди республикадин недай-хъвадай промышленностдин илимдин ахтармишунардай институтда чIехи лаборантвилелай гатIунна. Ахпа технолог Махачкъаладин балугърикай консервиярдай комбинатдиз рекье туна. Ина кIвалахай са куьруь вахтундилай Ф. Эмирова карханадин парткомдин секретарвиле хкяна. Кардин гъавурда авай, везифайрив жавабдарвилелди эгечIзавай, кIвалах вилик тухунал инсанар желбдай бажарагъ авай дишегьли КПСС-дин Дагъустандин обкомдин инструкторвиле тайинарзава.
1977-йисуз Фатима Абдурагьмановнадин хиве Махачкъала шегьердин исполкомдин председателдин заместителвилин везифаяр твазва. 1994-йисалай 2000-йисалди ам меркездин администрациядин кьилин заместитель тир.
Къейд авун лазим я хьи, 1977-йисалай инихъ Дагъларин уьлкведин меркез хейлин чIехи ва гегьенш, агьалийрин кьадарни артух хьана. Шегьердин яшайишдин, культурадин, образованидин, здравоохраненидин, спортдин месэлаяр гьялунин карда Фатима Абдурагьмановнади вичин вири чирвилер, алакьунар, тежриба ишлемишна. Адахъ галаз санал кIвалахай юлдашри къейд авурвал, Эмирова вичиз талукь вири везифайрин гъавурда хъсандиз авай, гьар са месэла, гежел тевгьена, гьялдай, агьалийрин гъавурда акьадай руководитель тир.
Фатима Абдурагьмановнади хейлин йисара Дагъустандин дишегьлийрин союзда общественный кIвалахни авуна. Адахъ галаз союзда республикада тIвар-ван авай дишегьлийри — Хаписат Гьамзатовади, Такибат Магьмудовади, Гьуьруь Пирсаидовади, Наида Абдулгьамидовади дагъви дишегьлийрин месэлаяр гьялна. Уьлкве чкIай, вири какахьнавай 1990-йисара виридаз гьуьрметлу общественный деятелдин гафунихъ къуват авай. Эмировади гьа чIавуз гзафбуруз руьгьдай ават тавун, кардал машгъул хьун патал куьмекна.
Фатима Абдурагьмановнадиз гьукуматдин патай ганвай хейлин шабагьар авай. Бажарагълу руководитель, общественный деятель, гьуьрметлу инсан багърийри, ам чидайбуру, санал кIвалахайбуру яргъалди рикIел хуьда.
«ЛГ»
