СтIал Сулейманан – 155 йис
Бакудин «Экспо-центрада» 2-8-октябрдиз ктабрин международный выставка кьиле фена. Къецепатан уьлквейрай атанвай писателри, таржумачийри, чапханайрин регьберри иштиракай и чIехи мярекатда лезги халкьдин машгьур шаир, «Самур» газетдин кьилин редактор Седакъет Керимовади лезги эдебиятдиз талукь выставкани тешкилнавай.
Лезги эдебиятдиз талукьарнавай выставкада С. Керимовади Дагъустандин халкьдин шаир СтIал Сулейманан эсерриз талукьарнавай кьилдин пIипIни кардик кутунвай. Виридан фикир желбдай чкадал XX асирдин Гомеран чIехи суьретни эцигнавай. И стенд СтIал Сулейманан 155 йисан юбилейдиз бахшнавайди чир хьайила, мярекатда иштиракай гзафбур лезги эдебиятдин выставкадиз мукьва хьана. Абуру шаирдикай Седакъет Керимовади авур ихтилатрихъ рикI алаз яб акална. Мукьвара Бакуда СтIал Сулейманан юбилейдин мярекат кьиле фидайди чир хьайила, чпизни ана иштиракиз кIанзавайдакай хабар гана.
Ктабрин выставка 7 юкъуз давам хьана. Международный дережада аваз кьиле фейи ихьтин мярекатда лезги эдебиятдин пIипIни хьун дамахдай кар я. И рекье зегьмет чIугвазвай Седакъет Керимовадиз аферин!
Чи мухбир
