«Мак-2024» серенжемдин нетижада
«Мак-2024» серенжемдин сергьятра аваз, полициядин къуллугъчийри Тарумовский районда, 24 йисан яшда авай чкадин агьалидин кIвал ахтармишдайла, набататдин наркотикар дуьздал акъудна ва абур вахчуна. Идакай РД-дин МВД-дин пресс-къуллугъди хабар гузва.
Дуьздал акъудай наркотикар экспертиза авун патал рекье туна. Ахтармишунин нетижайрал асаслу яз, полицейскийри вахчурди 155 граммдин заланвал авай марихуана тир.
Полициядин къуллугъчийри Дагъустандин сергьятра и юкъуз мад 205 грамм набататдин наркотик дуьздал акъудна. Санлай къачурла, фад кьилиз акъудай серенжемдин нетижада суткадин къене къуллугъчийри 360 грамм наркотикар вахчуна.
РФ-дин УК-дин 228-статьядай уголовный делояр къарагъарнава.
Чилерин «савдагар»
РД-дин МВД-дин УЭБиПК-дин (экономикадин хатасузвилин ва коррупциядихъ галаз женг тухунин управление) къуллугъчийри, ахтармишунар авурла, тайинарайвал, Дербент райондин са хуьре тапан документралди 2500 квадратный метрдин майдандин чилин участокар хсусиятчидин кIвачихъ ягъай делил дуьздал акъатна. Къейдзавайвал, чилин участокар хуьруьн администрациядин балансдал алай.
Силис тухвайбуру малумарзавайвал, тапан документар ишлемишунай чкадин агьалидал шак физва.
Тахсиркарвилин лишанриз килигна, РФ-дин УК-дин 159-статьядин 3-паюнай (лутувал) уголовный дело къарагъарнава. Ахтармишун давам жезва.
«Лезги газет»
