И мукьвара кIелзавайбурув Тамила Хуршидовадин «Дидедин къужах» тIвар алай цIийи ктаб агакьна. 150 чиникай ибарат и шииррин кIватIал автордин са шумуд йисан яратмишунрин нетижа я. Ктабдин сифте гафуна Т. Хуршидовади кхьизва: «За фагьумзавайвал, шиирар инсандин фикирар, веревирдер, сирлу хияларни гьиссер я. Абур къарши гьиссерин арада тесниф жезва: уьмуьрдинни ажалдин, кIанивилинни такIанвилин, кьарувилинни нифретдин, дуствилинни душманвилин, вафалувилинни хаинвилин…».
Ктабда дидейриз бахшнавай кIанивилинни гьуьрметдин, рагьметлубурукай гьайифдинни къадирлувилин, алатай вахтарин («Гьажи Давуд»), къенин йикъан («Лезги офицер») игитрин къамат къалурнавай, бахтлу муьгьуьббатдикай («Зун гаф жеда, рикIяй милиз лугьудай…»), чIулав мусибатдикай («Са зилиди хъвазва иви…») ва маса гьар жуьре шиирар гьатнава.
Ктабдин эхирда адан редактор, Дагъустандин халкьдин шаир Фейзудин Нагъиева кхьизва: «Шаирдин эсерар девлетлу чIалалди, фикиррин деринвилелди, цIийи рифмайралди, гьяз къведай ажайиб гекъигунралдини рангаралди, инсанрин къаматрин керчеквилелди рикIел аламукьдайбур я».
Тамила Хуршидовадихъ кIелайла рикIелай тефидай цIарар гзаф ава, месела, ихьтинбур:
Намус даим вине кьуна къеледлай,
Заз гунагьар чидайди туш бинедлай —
Ам пай я заз атанвай зи дидедлай.
Зи лап чIехи гунагьдин тIвар вун я, вун.
Поэзиядин гьар жуьре такьатрикай менфят къачуналди, авторди дерин гьиссер ачухарзава, ада вичин шииратдин цав экуь гъетералди чIагурзава, шиирар зарлу ва фараш рангаралди кхьизва. Чна Т. Хуршидовадихъ яратмишунрин рекье чIехи гележег авайдахъ умудзава.
Максим Алимов,
Дагъустандин писателрин союздин секретарь
