РД-дин хуьруьн майишатдин ва недай суьрсетдин министр Мухтарбий Аджекова республикада къушчивилин хел виликди тухуниз талукь совещание тухвана, хабар гузва идарадин информациядин къуллугъди. Мярекатда министерстводин къуллугъчийри, гьакIни Дагъустандин къушчийрин ассоциациядин векилри, и хиле кIвалахзавай карханайрин регьберри ва пешекарри иштиракна.
РикIел хкин, 2023-йисан нетижайралди, Дагъустанда маса гун патал гьасилзавай вечрен какайрин кьадар 247 миллиондиз, вечрен як лагьайтIа, йиса 51,8 агъзур тонндиз барабар тир. Совещанидал къейд авурвал, производстводин жигьетдай мумкинвилер аватIани, Россиядин регионрин юкьван кьадардив гекъигайла, гьар са касдал гьалтзавай какайрин кьадардай чи республика хейлин гуьгъуьна ава. ИкI, медицинадин истемишунралди, Дагъустандин базарда йиса 834 миллион кака ва 128 агъзур тонн вечрен як маса гунин игьтияж ава.
Алай вахтунда, министрди хабар гайивал, республикада производстводин кьадар артухарунихъ ва игьтияжар къецяй куьмек галачиз таъминарунихъ элкъуьрнавай кIвалах кьиле тухузва. Кьилди къачуртIа, Дагъустандин гьар жуьре районра къушчивилин хилен 8 инвестпроект уьмуьрдиз кечирмишзава. Мукьвал тир пуд йисан вахтунда абур акьалтIарун лазим я. ЦIийи проектар нетижалудаказ уьмуьрдиз кечирмишуни йиса гьасилзавай вечрен якIун кьадар — 31 агъзур тонндин, маса гузвай какайрин кьадар -30 миллиондин, цицIибар ахъаюн патал ишлемишиз жедай якIун жинсерин верчерин какайрин кьадар 35 миллиондин гзафардай мумкинвал гуда.
Къушчивилин хилен векилри совещанидал чпин кIвалахда гьалтзавай гьар жуьре четинвилерикай лагьана. Абуру къейд авурвал, и хилен хийирлувал муьштерийрин базарда къиметрин жигьетдай авай гьалдилай аслу я. Важиблу месэлайрикай сад — кФъушчивилин хел виликди тухунин карда жезвай харжийрин чIехи пай емдал гьалтзава, адан къиметар лагьайтIа, датIана виниз физва. Карханайрин векилри къейд авурвал, къушчивилел машгъул са жерге районра верчер тукIвадай цехар эцигунин карда государстводин патай куьмек гунин игьтияж ава. Са 15 йис идалай вилик къушчивилин хел виликди тухун патал государстводи виле акьадай хьтин кьадарра аваз субсидияр чара ийизвайди тир. Ида карчийриз производстводин дараматар эцигдай, тадаракар маса къачудай мумкинвал гузвай. Нетижада гьасилзавай суьрсетдин кьадарни гзаф жезвай.
М.Аджекова къейд авурвал, къенин юкъуз республикадин руководстводи къушчивилин хилез гузвай куьмекдин кьадар артухаруниз итиж ийизва. Ада къушчивилин хиле кIвалахзавайбурувай ассоциациядихъ галаз санал чпиз герек куьмекдиз талукь тир якъин теклифар гьазурун тIалабна.
Чи мухбир
