Агъаханов Загьидин Агъаханович 1980-йисуз Белиж поселокда лежбердин хизанда дидедиз хьана. 1-нумрадин юкьван школадин 9-класс акьалтIарайла, ам Белиждин СПТУ -дик экечIна. 1999-йисуз ам хиве авай буржи тамамариз, Кеферпатан флотдин гьуьлуьн пияда кьушунрин частуниз акъатна. Сифте йикъалай намуслувилелди военный пеше чирна. Ам вичел ихтибарнавай яракьдихъни женгинин техникадихъ хъсандиз гелкъвез, вири чирвилер агалкьунралди тежри­бада ишлемишиз хьана. ИкI тирди адан диде-бубадиз военный частунай рахкурай чухсагъулдин чарчи тести­кьар­зава: «…Къуллугъзавай вахтунда Загьидина вич анжах хъсан патахъай къалурна.

Аскервилин буржи тамамарунин карда­ куь хва виридаз чешне я. Гьуьлуьн пия­да кьушунрин сейли тIвар хкажуник вичин пай кутазва. ЧIехи несилдин женгинин баркаллу­ адетар давамарун патал абурун жуьрэтлу­вилин, викIегьвилин, Ватандиз къуллугъ авунин чешнейралди вичин чирвилер хкажза­ва. Загьидин юлдашриз гьамиша куьмек гуз гьазур аскер я. Кьегьал хва, ватанперес тербияламишунай чна квез сагърай лугьузва».

…2001-йисуз ам армиядин жергейрай­ хтана. Гьукуматдин карханаяр, совхозар чкIай девирда гьар са хизандиз кьил хуьз четин хьанвай, ругуд велед чIехи ийиз­вай — Агъаханан хизандизни. Фялевал авур ирид йисуз жегьил гададиз зегьметдин къимет чир хьана. Аскервилин вахтар адан рикIелай алатзавачир. И фикирри ам армиядин жергейра къуллугъдайвал икьрар кутIундай рекьел гъана. ИкI, 2008-йисуз  икьрардин бинедаллаз Загьидин вичи кьве йисуз къуллугъ авур гьуьлуьн пияда кьушунриз аватна. Тарсара, полигондал, ученийра гьар са аскердин гьал, гьерекатар, абуру чеб тухузвай къайда, чирвилер ахтармишзава. Хъиткьинардай пакетар, гумадин шашкаяр, цIун жугъунар ишлемишзава, алай аямдин женгини лап виниз тир дережада гьазурвал истемишзава.

2019-йисан гатфариз чеченрин «Се­вер» батальондихъ галаз Загьидин авай частунай 10 касди Сирияда кьиле фейи вакъиайра иштиракна. Ана хьайи пуд вацра абуру Дамаск шегьердин къвалав­ гвай Кадсай шегьерда патрулвална, къайдаяр чIурзавайбурун вилик пад кьуна, идараяр, дараматар, алакъадин важиблу объектар саламатдиз хвена, минаяр зарарсуз авуна, чкадин халкьдиз жедай куьмекар гана.

Яракьлу акьунар авай шартIара везифаяр тамамаруна чалишмишвилерай ва къуллугъда къалурай алакьунрай Зигьидин Агъаханов “КьетIен шартIара къуллугъда тафаватлу хьунай” хурудал алкIурдай лишандиз лайихлу хьана. Ада рикIел хкизвайвал, Дамаскда, къваларив гвай шегьерра саки са пай кIвалер, дараматар харапIайриз элкъвенвай. Им ана кьиле фейи къати женгерин нетижа тир.

Сириядай хтайла, З. Агъаханова ви­чин­­­ частуна къуллугъ авун давамарна­. Дя­ведин махсус серенжем гатIунай йи­къа­­лай ада къуллугъзавай баталь­онди ана иштиракзава. Пуд вацра махсус серенжемда жезва, пуд вацра чпи къуллугъ­завай частуна.

«Чи къуллугъ Ук­раи­на­дин миллетчийрал гъалибвал къа­зан­миш­дал­ди давам жеда», — лагьана Загьидина.

Махсус серенжемда гьикI иштирак­за­ватIа, ада къуллугъзавай частунай диде-бубадин тIварцIел частунин командирдилай хтанвай чухсагъулдин чарчяй аквазва: «Гьуьрметлу Агъахан Къараханович ва Рабият Гьажикеримовна! Разивилелди хабар гузва хьи, куь хва, сержант Агъаханов Загьидин Агъахановича махсус серенжемда аскервилинни ватанпересвилин буржи намуслувилелди тамамарзава. Военный кьинез вафалу, гьукуматдин итижар хуьзвай, Ватандиз намуслувилелди къуллугъзавай куь хци вичин везифаяр жуьрэтлувилелди тамамарзава.

Куь хцелай вири аскерри чешне къачузва. Ватан хуьдай дирибаш хва чIехи авунай чна квез сагърай лугьузва. Квевай хцел дамах ийиз жеда!

Частунин командир, майор         

Р. Ахматханов».

Сержант З. Агъаханов пуд ва кьвед ла­гьай дережайрин «Къуллугъда тафаватлу хьунай», «Махсус серенжемдин иштиракчи» медалрин, «Къулугъдин отличник» лишан­дин сагьиб я.

З. Агъаханов эвленмиш хьанва. Адахъ пуд велед ава — кьве гадани са руш.

Къагьриман  Ибрагьимов