Дагъустан Республикадин Конституциядин юкъуз Сергей Меликова гзаф аялар авай диде-бубайрив, муаллимрив, духтуррив, аскеррив, культурадин деятелрив ва маса хилерин векилрив государстводин шабагьар вахкана. Абурун арада СтIал Сулейманан райондин ЦIийи хуьруьн юкьван школадин муаллим Нисейхалум Амахановани ава. Адав Сергей Меликова «Дагъустан Республикадин лайихлу муаллимдин» шагьадатнама вахкана.
Н. Амаханова 1972-йисуз Махачкъалада дидедиз хьана. Школа лап хъсан къиметар аваз акьалтIарай ам ДГУ-дин математикадин факультетдик экечIна, 1995-йисуз анаг акьалтIарна.
1993-йисуз Нисейхалум Альбертовнади ва ДГУ-дин студент тир кьасумхуьруьнви Теймур Рзахановича чпин кьисметар сад авуна, хизан кутуна.
Вуз акьалтIарайдалай инихъ Н. Амахановади ЦIийихуьруьн юкьван школада кIвалахзава.
Нисейхалум Альбертовнадин яргъал йисарин намуслу зегьметдиз лайихлу къиметни ганва. ИкI, 2009-йисан июндиз «Россиядин Федерациядин умуми образованидин гьуьрметлу работник» лагьай тIвар, Дагъустан Республикадин образованидин ва илимдин министерстводин приказдалди кьилин пешекарвилин категория гана. ЦIи абурал «Дагъустан Республикадин лайихлу муаллим» тIвар алава хъхьана.
Нисейхалум Альбертовнадин уьмуьрдин юлдаш Теймур Рзахановични ЦIийихуьруьн юкьван школада физкультурадин муаллим я.
Нисейхалум ва Теймур Амахановар, тежрибалу муаллимар хьиз, низам, ахлакь авай кьве веледдин диде-бубани я. Руш Исмиради Каспийск шегьерда военный частуна кIвалахзава. Правовой академия акьалтIарнавай гада Эмир Махачкъалада карчивилел машгъул я.
Нисейхалум Амахановадиз «Дагъустан Республикадин лайихлу муаллим» лагьай тIвар мубарак авуналди, чаз адахъ мягькем сагъламвал, кIвалахда мадни еке агалкьунар хьана кIанзава.
Хазран Кьасумов
