Англиядин, Германиядин, США-дин яракьар гваз ва къецепатай атанвай бандитрин куьмекни галаз Украинадин миллетбазар 6-августдиз Курскдин областдин мулкариз гьахьна. Абуру мад сеферда чпин инсансузвал, инсафсузвал къалурна. Областдин хуьрера яшамиш жезвай ислягь инсанриз, кьуьзуьбур, аялар, дишегьлияр талгьана, гуьлле гана, кIвалер, дараматар танкарай, тупарай яна, хъиткьинарна. ЦIудралди кIвалер кана, руьхъведиз элкъуьрна.
Гьелбетда, ихьтин инсафсузвилер абуруз иливдач. Россиядин сергьятдилай элячIай гьа сифте йикъалай РФ-дин Яракьлу Къуватри миллетбазрив вил ахъайиз тазвач. «Север» группировкадин кьушунрин подразделенийри, авиациядикай, артиллериядикай менфят къачуналди, тамара чуьнуьх хьанвай диверсантрин дестеяр жагъурзава ва тергзава. Областдин Алексеевка, Сафоновка, Шептуховка, Комаровка, Ольговка, Русское, Черкасское, Поречное хуьрерин къваларив къизгъин женгер кьиле фена. Гьар женгина миллетбазрин вишералди аскерар къирмишна, дяведин техника барбатIна.
Цава Ми-28нм ва Ка-52 вертолетрин экипажри кIвалахзава ва абуру душмандин аскерар алай чкаяр чирзава, бронмашинар ва дяведин маса техника язава. Эхиримжи суткада 300 миллетбаз ва 30-далай виниз техника тахьай мисална.
КьетIен везифайрин «Ахмат» дестедин командир Апты Алаудинова малумарайвал, миллетбазриз, Курскдиз гьахьна, Москва чпиз хийирлу ислягьвилин икьрар кутIундай чкадал гъиз кIанзавай. Амма абурун хиялар кьиле фидайбур туш. Москвадин фикир сад я: миллетбазар цIийи фашистар терг авун, абурукай мад садазни къурху хкат тавун. Гьавиляй вири сергьят тирвал мулкар, хуьрер РФ-дин Яракьлу Къуватрин гуьзчивилик ква ва гьинай душман пайда хьайитIани, ам гуьлледик акатзава. СакIани тежедайла, неонацистри областдин муькъвер хъиткьинарзава.
18-августдиз ЧIулав гьуьлуьн флотдин 810-бригададин пияда аскерри душмандин 19 диверсант есирда кьуна. Идалай виликни есирда хейлинбур гьатнавай. Абуруни къейдзавайвал, Россиядин сергьятдиз гьахьайбурук РагъакIидай патан уьлквейрин аскерарни ква.
Гьеле диверсантар тамамвилелди тергнавач. Женгер давам жезва. Курскдин, Белгороддин, Брянскдин областрин кIеве гьатнавай агьалийриз вири уьлкведи куьмек гузва. Душман тергда ва чун гъалиб жеда.
Азад Абадов
