Донбасс миллетбазрикай хуьн патал дяведин махсус серенжемда иштиракун, ватанпересвал къалурун — им игитвал я. Герейханован хуьряй тир Ражаб Гьадисоваз кьегьалвилерай «Къизилдин Гъед» ордендихъ галаз санал «Дагъустандин халкьдин Игит» лагьай тIвар гана. СВО-дин аскердихъ маса шабагьарни ава.
ЧIехи тIвар мубарак авун патал райадминистрациядин кьилин заместитель Абуталиб Фатулаев Ражаб Гьадисовахъ галаз гуьруьшмиш хьана. Райондин Кьил Саид Темирханован ва вичин патай «Дагъустандин халкьдин Игит» чIехи тIвар мубарак авунихъ галаз санал, А.Фатулаева Ражабаз чухсагъул лагьана, ам хьтин жумарт рухвайрал халкьди дамахзавайди къейдна.
Гуьруьшдал Ражаб Гьадисова вичин къуллугъдикай, тамамарзавай везифайрикай ихтилат авуна. Ада СВО-дин зонада БПЛА-дин техник яз къуллугъзава. Виликдай ада Сирияда ва Дагълух Къарабахда къуллугъна.
Абуталиб Фатулаева СВО-дин аскердивай дерди-гьални хабар кьуна. Ражаб Гьадисова райондин кьиле авайбурувай вичиз яшайишдин кIвал эцигун патал чилин участок чара авунин карда куьмек гун тIалабна.
А.Фатулаева Герейханован хуьруьн поселенидин кьил Руслан Алдыровал и тIалабуниз килигун, учетдиз къачун тапшурмишна, гьа са вахтунда рикIел хкана хьи, Ватан хуьзвайбурун ва абурун хизанрин гьакъиндай къайгъударвал авун, абурун тIалабунар кьилиз акъудун лап важиблу месэла я.
Хазран Кьасумов
