Дагълара куьгьне хуьрер хуьник, абур аваданламишуник пай кутаз алахъзавай рухваярни рушар майдандиз экъечIзавайдакай чи газетда хейлин макъалаяр чапнава. Месела, Хив райондин АрхитIрин, Тркалрин мулкарал вичин харжийрихъ фермервилин цIийи майишатар арадал гъун (Зарета Фаталиева), Ахцегь райондин Чеперин хуьруьз газдин линия агакьарун (стхаяр тир Шириновар), Ахцегьа жегьилар патал ял ядай ва спортдинни сагъламвилин чIехи комплекс хкажун хьтин (Жигерхан Сулейманов) ва маса крар рикIел къвезва.
И йикъара Докъузпара райондин Миграгърин яшлу ксарин патайни чав чар агакьна. Ана хабар гузвайвал, и куьгьне хуьре фадлай къайдадикай хкатнавай рекьер, куьчеяр, кIамарал алай муькъвер цIийикIа туькIуьр хъийиз, Усугъчайдилай Миграгъиз кьван къвезвай машиндин куьгьне рехъ арадал хкиз кIвалахзавай жегьилрин десте кардик акатнава. Хуьруьн кавха Тимур Бабаева, райбольницадин духтур Халикь Байрамова, эцигунрин устIарар тир Фарид Сейфуллаева, Артур Абасова гуьгьуьллувилелди чпин азад вахт винидихъ къалурнавай крариз серфзава. Хуьруьн саки вири магьлейра машинривай физ жедай гегьенш рекьер, муькъвер хьанва. Абур неинки гегьеншарнава, синер, лекъвер акъудна, цIалцIамарнава, гьакI дагъдай гъана, яру херхем вегьена, мягькемарнава. Рекьера яд гьат тийидайвал къерехар кьунва, кIамарик турбаяр кутунва.
Са шакни алачиз, ибур еке харжийрихъ галаз алакъалу крар я. ГьикI хьи, машинар, тракторар, рехъ цIалцIамардай тадаракар кирида кьазва. Кудай, ягъламишдай шейэр (бензин, солярка) маса къачузва.
Вири крариз харжияр кьегьал хва, жегьил карчи Тарлан Микаилович Исмаилова (шикилда) ийизва. Ам Бакуда хана, Миграгъа вичин дидедин рекьяй халуяр тир Бислимоврин кIвале чIехи хьана, ина юкьван школа акьалтIарна, карчивилел машгъул жезва. Халуйринни чIехи бубайрин хуьруьз куьмекар гуналди Тарлана вич гьакъикъатдани тIварцIел атай хва тирди субутзава. Вири миграгъвийри, иллаки яшлу ксари Тарланаз, адаз тербия гайи диде-бубадиз, муаллимриз сагърай, аферин квез лугьузва.
Крар бажармишиз алакьзавай гьар са хци ва руша ихьтин кIвалахрик кьил кутуртIа, шаксуз, чи куьгьне хуьрер садни квахьдач, виринра цIийи уьмуьрдал чан хкведа.
Сагърай куь къуршах!
Сагърай куь ужагъ!
Даим вине хуьх
Дагъви къанажагъ!
Мерд Али
