Росстатдин ахтармишунрин нетижада малум хьайивал, муаллимрин мажибрин кьадардал гьалтайла, Кеферпатан Кавказдин регионар виридалайни гуьгъуьна ама. Россиядин регионрин арада юкьван гьисабдин кьадардив гекъигайла, абурун мажибар агъузбур я.
2024-йисан сад лагьай кварталда муаллимрин виридалайни гъвечIи мажиб Ингушетияда къейдна — 26,4 агъзур манат. Сиягьдин виридалайни гуьгъуьна авай пуд региондик гьакIни Карачаево-Черкесия (29,9 агъзур) ва Чечня (31,1 агъзур) ква. Агъуз тир мажибар къачузвайбурук Крымдин муаллимарни акатзава — 34,1 агъзур манат.
Идалай са тIимил хъсан гьалда Кеферпатан Осетиядин ва Дагъустандин муаллимар ава. Инра абуру, талукь яз, 31,9 ва 32,5 агъзур манат къазанмишзава.
Кеферпатан Кавказдин регионрин арада мажибрин жигьетдай кIвенкIвечи чкаяр Кабардино-Балкарияди (35,8) ва Ставрополдин крайди (38,5) кьунва.
Винидихъ къейд авурвал, и делилар Россиядин регионрин арада юкьван гьисабдин кьадардилай — 58,1 агъзур манат — виле акьадайвал агъузбур я. Виридалайни виниз тир мажибар Чукоткадин (147 агъзурдалай гзаф), Магадандин областдин (тахминан 134 агъзур) ва Ямалдин (133 агъзур манат) муаллимри къачузва.
Жасмина Саидова
