Хкаж жеда
Дагъустанда 2025-йиcуз агьалийриз яшамиш хьун патал чарасуз герек такьатрин агъа кIанин кьадар 14,7 процентдин хкаж жеда. Идакай «Дагъустан» РИА-ди хабар гузва.
Чешмеди, РД-дин Гьукуматдин къарардал асаслу яз къейдзавайвал, 2025-йисуз агьалийриз яшамиш хьун патал чарасуз герек такьатрин агъа кIанин кьадар 16 агъзурни 137 манатдал кьван хкаж жеда (2024-йисуз и рекъем 14 агъзурни 62 манатдиз барабар я).
Кьилди къачуртIа, алукьзавай йисуз ПМ-дин (прожиточный минимум) агъа кIанин кьадарар ихьтинбур жеда:
кьилдин гьар са агьали патал (на душу населения), винидихъ къейднавайвал, — 16 агъзурни 137 манат;
зегьметдиз къабил агьалияр патал — 17 агъзурни 589 манат;
пенсионерар патал — 13 агъзурни 878 манат;
аялар патал — 15 агъзурни 653 манат.
Виликдай чна, «Интерфакс» изданидал асаслу яз, хабар гайивал, яшамиш хьун патал чарасуз герек такьатрин агъа кIанин кьадар агьалийрин игьтияжрин, гьа жергедай яз аялриз гьар вацра гузвай, гьакIни тIимил таъмин хизанриз гузвай социальный гьар жуьре выплатайрин гьахъ-гьисаб ийидайла, фикирда кьазва. ПМ хкажунихъ галаз сад хьиз, аялар галай, агьвал хъсан тушир хизанриз гузвай выплатайрин, са жерге хилерай яшайишдин икьрардин ва гьакIни федеральный ва региональный дережада пенсийрал алава хъийизвай пулдин такьатрин кьадарни артух жезва.
Саки 800 касди
Дагъустанда саки 800 касди догазификациядин программадин сергьятра аваз гузвай яшайишдин выплатайрихъ чпиз газ ишлемишдай тадаракар (газопотребляющие бытовые приборы) маса къачунва. Идакай «Дагъустан» РИА-ди хабар гузва.
Чешмеди кхьизвайвал, РД-дин энергетикадин ва тарифрин министерстводи чпиз яшайишдин рекьяй тайин кьезилвилер талукь тир агьалийриз (гзаф аялар авай хизанар, тек пенсионерар, набутар ва мсб.) газдин тадаракар маса къачун ва газдин сетар кIвализ тухун патал гьукуматди куьмек яз пулдин такьатар чара ийизвайди рикIел хкизва.
И серенжемар патал яшайишдин са кIвализ100 агъзур манатдилай гзаф тушиз пулдин такьатар чара ийизва.
Чпикай ихтилат физвай и къуллугъар агьалийривай МФЦ-дай, «Госкъуллугърин» сайтдай ва я агьали яшамиш жезвай чкадин яшайишдин управленидай къачуз жеда.
Йисан кIвалах — зур йисуз
Яшайишдин кIвалер эцигунал гьалтайла, са йисан къене кьилиз акъудна кIандай план Дагъустандин зур йисан къене уьмуьрдиз кечирмишнава. Идакай «Дагъустан РИА-ди хабар гузва.
Чешмеди, РД-дин эцигунрин, архитектурадин ва ЖКХ-дин министерстводал асаслу яз, кхьизвайвал, 2024-йисан сад лагьай паюна Дагъустанда яшайишдин кIвалер вахкунин кьадар, алатай йисан и муддатдив гекъигайла, вад сеферда артух хьанва.
Кьилди къачуртIа, ведомстводин делилралди, республикада 2024-йисан январдилай июндалди 2 миллионни 93,2 агъзур кв.метр яшайишдин кIвалер ишлемишиз вахканва. Им, 2023-йисан январь-июнь варцарин нетижайрив гекъигайла, 499,2 процентдин гзаф я.
Къейдзавайвал, важиблу рекъем ИЖС-ди (индивидуальное жилищное строительство) къалурнава: и рекьяй 1 миллионни 872 агъзур кв.метр ишлемишиз вахканва. Гзаф квартирайрин кIвалерикай рахайтIа, и хилени хъсан нетижаяр хьанва: 221,2 агъзур кв. метр вахканва. Им, 2023-йисан и муддатдив гекъигайла, 108,1 процентдин гзаф я.
Сифтегьан пудак акатзава
Чилин участокрин къиметрин багьавилел гьалтайла, Дагъустан уьлкведин сифтегьан пуд региондик акатзава. Идакай «Дагъустандин экономика» телеграм-каналди хабар гузва.
Чешмеди кхьизвайвал, «Циан.Аналитика» сервисдин экспертрин делилралди, РД-да чилин са соткадин къимет юкьван гьисабдалди 810 агъзур манатдиз барабар я. Хабар гузвайвал, СКФО-дин маса регионра чилин са соткадин къимет юкьван гьисабдалди 321-465 агъзур манат.
Экспертрин делилралди, Кеферпатан Кавказдин регионрикай Кеферпатан Осетияда участокрин къиметар виридалайни ужуз я.
Гьа са вахтунда, аналитикрин гьисабунралди, уьлкведа са йисан къене чилин къиметар 25 процентдин хкаж хьанва, кьилди СКФО-да лагьайтIа — 30 процентдин.
Гьазурайди — Муса Агьмедов
