Докъузпара райондай тир спортдин тренер, муаллим Ариф Гъафизов Кьиблепатан Дагъустанда гзафбуруз чида. Акьалтзавай несилриз спортдай вердишвилер гунилай гъейри, ада абур халис ватанпересар яз чIехи хьунин жигьетдайни еке кIвалах кьиле тухузва.
РД-дин физический культурадин ва спортдин министерстводин пресс-къуллугъди хабар гузвайвал, А.Гъафизова Мискискарин хуьре вичин кIвале спортзал ачухнава ва анаг герек тир алатралди таъминарнава. И карди чкадин аялриз спортдал машгъул жедай ва армрестлингдай, путар хкажунай, спортдин милли жуьрейрай тешкилзавай жуьреба-жуьре акъажунриз гьазурвилер аквадай мумкинвал гузва.
А.Гъафизов женгинин искусствойрай спортдин мастер я. Дагъустанда спорт ва физический культура вилик тухуник пай кутунай ам виликдай винидихъ тIвар кьур министерстводин патай Разивилин чарчиз лайихлу хьанай.
Мукьвара РД-дин физический культурадин ва спортдин министр Сажид Сажидова ам жемиятдин крарин рекьяй вичин куьмекчи яз тайинарна. Махачкъалада кьиле фейи гуьруьшдал министрди А.Гъафизовав куьмекчидин шагьадатнамани ГТО-дин отличникдин лишан вахкана.
Агьмед Магьмудов
