Дагъустан Республикадин Кьил Сергей Меликова 6-августдиз йикъан месэлайрай совещание кьиле тухвана. Анал гьукумдин органри агьалийрин арзайриз жаваб гунин, Дагъустандин са бязи районриз татугай гьавайри гайи зиянар арадай акъудун патал кьабулзавай серенжемрин, республикадин делегацияди Кавказдин инвестицийрин форумда иштиракунин нетижайрин ва «Национальная система пространственных данных» госпрограмма уьмуьрдиз кечирмишунин месэлаяр веревирдна.
Мярекатдин сифте кьиляй Сергей Меликова регионда кьиле тухвай кадрийриз талукь дегишвилерин гьакъиндай баянар гана. «Кадрийрин сиясат чна Дагъустандин халкьдиз гьикI кIанзаватIа, гьакI кьиле тухуда», — лагьана ада. Республикадин Кьили къейд авурвал, кадрийрин сиясат сифте нубатда министерствояр, ведомствояр кар чидай, пешекар къуллугъчийралди таъминарунин макьсаддалди кьиле тухуда. Региондин милли кьетIенвилерни гьисаба кьада. Амма сифте нубатда къуллугъдал эцигзавайбурун пешекарвилиз, алакьунриз фикир гуда.
«Кадрийрин сиясат чна халкьдиз гьикI кIанзаватIа, гьакI кьиле тухуда. Пешекаррихъ галаз датIана кIвалах тешкилзава. Кадрийриз талукь дегишвилер са гьихьтин ятIани инкъилаб хьиз кьабулмир. Гьар сеферда цIийи кас къуллугъдал эцигунихъ вичин себебар ава. Сада хушуналди арза кхьизва. Масадалай вичин везифаяр тирвал, алай аямди истемишзавай тегьерда кьилиз акъудиз жезвач. Им вири уьлкведа тIебии гьал я. Министрар, абурун заместителар, вице-премьерар, депутатар дегиш жезва, им тIебии гьал я», — баянар гана региондин Кьили.
Июлдин вацра Дагъустандин ЦУР-диз атай арзайрин гьакъиндай РД-дин Кьилин ва Гьукуматдин Администрациядин руководителдин заместитель, информациядин сиясатдин управленидин начальник Рашид Акавова малумат гана.
Атайбурукай гьукумдин идара ийидай органрин тIварцIихъ — 5,2 агъзур, муниципалитетриз — 3,7 агъзур, агьалияр энергиядалди, чимивилелди таъминарзавай организацийриз 3 агъзур арза рекье туна.
Арзайрин саки са пай агьалияр энергиядалди таъминарзавай хилехъ галаз алакъалу тир, абур РД-дин энергетикадин министерстводиз ва «Дагэнергодиз» рекье туна. Июлдин вацра куьчейрай зирзибил тухун тавунилай наразивалзавай арзайрин кьадарни гзаф хьана. Идалай гъейри, гьам махачкъалавийри, гьам меркездин мугьманрини общественный транспортдилай ва автобусрин пенар тахьунилайни наразивална.
Рашид Акавова тIебиатдин бедбахтвилик акатай районра арадал атанвай гьаларикайни малумат гана. Рекьер чIурай, муькъвер тухвай селлер Агъул, Рутул, Чарода, Тлярата ва Кьурагь районра хьана. Бязи хуьрериз автотранспорт фидай рекьерни амукьнач. Электроэнергиядикай вахтуналди 49 хуьр хкатна. Талукь къурулушри хабар гайивал, вири хуьрер электроэнергиядалди таъминарун патал муниципалитетри герек серенжемар кьиле тухвана.
И месэладикай рахадайла, Сергей Меликова къейдна хьи, Дагъустанда, вацIари хуьрериз, рекьериз хата тагудайвал, серенжемар кьабулзава.
«Алай вахтунда чна вацIарин къерехра дамбаяр эцигуниз талукь финансар чара авунин месэладал кIвалахзава. Сифте нубатда пулар Чарода, Тлярата, ЦIумада, ЦIунтIи, Ахвах районриз ахъайда. Федеральный органрин куьмек галачиз и месэлаяр чавай гьялиз жедач. 2025-йисуз кIвалахрив эгечIун патал чун махсус программадик экечIна кIанда. И кардин тереф хуьн муниципалитетривайни тIалабзава. ТIебиатдин бедбахтвилик акатайбуруз куьмек гуниз талукь месэла и мукьвара РД-дин Гьукуматдин заседанидал гьялда», — лагьана Сергей Меликова.
Дагъустанда 14,8 миллиард манатдин къимет авай инвестицийрин кьве проектдив гатIуннава. Ихьтин мумкинвални Кавказдин инвестицийрин форумдал къулар чIугур къарарри гузва. И проектрикай РД-дин вице-премьер Руслан Алиева лагьана.
Инвестицийрин форум июлдин вацра Грозныйда кьиле фена. Дагъустандин делегацияди 2025-лагьай йисуз республикада международный «Устойчивое развитие горных территорий» форум кьиле тухунин теклиф гана.
Форумдал Россиядин регионрин экономика вилик тухуник пай кутазвай компанийриз инвестицийрин «Вершина» тIвар алай сад лагьай премияни гана. Дагъустандин «АлиЯк» ООО «Лучший инвестиционный проект в сельском хозяйстве» номинациядай премиядиз лайихлу хьана.
Хийир Эмиров
