Махачкъала шегьердин куьчейра жемиятдин улакьар акъваз жезвай пенар, алай аямдин истемишунар вилив хвена, цIийи къайдада туькIуьрдайвал я. Идакай саласа юкъуз РД-дин Кьил Сергей Меликован регьбервилик кваз кьиле фейи совещанидал меркездин мэр Юсуп Умавова хабар гана.

Санлай къачурла, цIийи хъувунвай пенар 94 чкада пайда жеда. Абур «WI-FI»-далди (пулсуз интернет), телефонар зарядка ийидай такьатралди, экв гудай лампайралди, гуьзчивал тухудай камерайралди, ацукьдай чкайралди, жуьреба-жуьре малуматрин баннералди таъминарда. Ихьтин сад лагьай павильонар Шамилан ва Гьамидован тIварарихъ галай проспектрин къекъуьндал алай пенрал кардик кутунва.

Махачкъаладин администрацияди агьалияр санай-масаниз тухудай цIийи автобусрин кьадар артухарунизни фикир гузва. И месэладин гьакъиндай РФ-дин транспортдин министерстводиз герек тир чарар рекье тунва. Санлай къачурла, 61 автобус маса къачудай ният ава. Абур шегьерда кардик квай 7 маршрутдиз чара ийидайвал я.

«Лезги газет»