Са вахтара зал Каспийскда вич  акурла, жуван кефиярни ачух ­жедай са кас гьалтдай. Къуншидал яшамиш жез­вайтIани (гила маса кIва­лериз экъечIнава), чун хъсандиз таниш тушир. Эхирни и югъ алукьна.

Зи ихтилат миграгъви Микаилов  Агъваверди  Шихбалаевичакай  я. Ам 1969-йисуз дидедиз хьана. Юкьван школа куьтягьай гада армиядиз (Калининский областдиз) тухвана. Ада авиациядин частара къуллугъна. И йисара адаз са шумудра командирри чухса­гъул малумарна, хуьруьз, ди­де-бубадизни аскердилай разивал къалурзавай чарар рекье туна. Армиядин жергейрай старший сержант яз хтай жегьилди Мамедова Венерадихъ га­лаз­ хизан кутуна. 1995-йисалай ада къайдаяр хуьдай органра кIвалахиз гатIунна.

Гзафбуруз чизвач Агъаверди Микаилов  Дагъустандиз атай бандитрин  хура  уьтквемдиз  акъвазунай Жуьрэтлувилин ордендиз ла­йихлу хьайи кас тирди. Ада рикIел хкизва:

“1999-йисан сентябрь. Кьадардин дере. Чубанмахи ва Къарамахи хуьрера къати женгер кьиле физ­­вай. Гагь чна, гагь бандитри гьужумар ийизвай. Гьикьван патай куьмекар гудай ксар авайтIани, гьукуматдин кьушунрихъ галаз бягьс чIугун яргъал фидай кар тушир. Бандитар са кьадар регьят шар­тIара авайтIани (ви­ри хуьрер сенгерриз элкъуьрнавай, чилин кIани­кай гьар патахъ фидай рекьер авай), абурувай яргъалди дурум гуз хьанач. Чаз авиациядини еке куьмек гана. Кьве гьафтеда кьван чна халис дяве тухвана. Садани буш­вал авунач. Нубатдин женгина (19-сентябрь) зи бедендал залан хер хьана. Зун юлдашри тади гьалда Левашадин райбольницадиз ага­кьарна. Ина  сифтегьан операция авуна ва югъ арадай фейила, Махачкъаладин госпиталдиз тухвана. Хейлин вахтунда зун зак квачиз хьана. Куьрелди лагьайтIа, духтурри кьиникьикай къутармишна. Сагърай чеб”.

Алай вахтунда дирибаш итимди ВТЭК-да шофер яз кIвалахзава.

Дидени буба Микаиловар чпин веледрилайни рази я. Эльвира гъуь­луьк ква, Лейлади ДГУ-дин био­­­логиядин факультетда кIел­за­ва. Диана 8-классдин ученица я.

Исламудин Гьуьсейнов, педагогикадин илимрин  кандидат