СтIалрин багълариз

Пуд СтIалрин гегьенш чуьллер,

Багълар хьанва бегьер гузвай.

Куьн акурла шад я рикIер —

Бахтлувилин эквер кузвай.

 

Пакам кьиляй гьатна ванер

Худда ава улакьарни.

КIвалахдик ква керкини пер —

Зегьметкешдин яракьарни.

 

Советскийдив агакьдалди

Гегьенш хьанва сергьятар.

И баркаван тир чилери

Халкьдиз гузва менфятар.

 

Къуй и багълар кутурбуруз

Сад Аллагьди нуьсрет гурай!

Хийирдин кар авурбуруз

Халкьдин юкьва гьуьрмет хьурай!

 

Къе СтIалрин паласада

Юкъуз, йифиз эквер ава.

Сагърай СтIал Имам стха,

Берекатрин цIирер ава!

 

КIватI хъийизвай ярни-емиш

Урусатдиз рекье твазва.

Зайиф тийиз стIун ериш

Зегьметчияр кIвенкIве ава.

 

Дамах тушни шуьмягърин багъ —

Чи уьлкведа сад лагьайди!

Гьар гьи емиш къачуртIани

Я вич хъсан дад галайди!

 

Мублагь хьурай лезги чилер,

Берекатар пара хьурай!

Шад жедайвал зегьметчияр,

Къуй бегьеррин хара хьурай!

«ЛГ»-дин 2024-йисан 28-нумрадай