Махачкъалада, Къизлярда ва Дербентда иеси авачир кицIер патал гьар сада 180 демек авай махсус чкаяр эцигда. Идакай РД-дин Гьукуматдин пресс-къуллугъди хабар гузва.
Дагъустандин вице-премьер Нариман Абдулмуталибован гафаралди, йисан къене эцигзавай чкайра 10 агъзурдалай виниз кицIер кьабулдай, гьакIни санитариядин, пехъивилин вилик пад кьунин серенжемар кьиле тухун патал шартIар тешкилда.
Алай вахтунда Дербент шегьерда ихьтин чка эцигна саки акьалтIарнава. Ада Кьиблепатан Дагъустандин саки вири муниципалитетрай иеси авачир кицIер кьабулда. Махачкъалада эцигзавай чкади — 23, Къизлярда кардик акатдайда 12 муниципалитетдиз къуллугъда.
Къейд ийин хьи, иеси авачир кицIерихъ галаз алакъалу месэладиз республикадин гьукумдин кьилевайбуру кьетIен фикир гузва. Эхиримжи йисара ахьтинбурун кьадар тIимил хьанватIани, пехъи кицIери инсанрал вегьезвай дуьшуьшар гьар йисуз жезва. ТАСС-дин делилралди, 2024-йисан сад лагьай паюна иеси авачир кицIери кIасай саки 1 агъзур касди медицинадин рекьяй куьмек тIалабна.
Чи мухбир
