СтIал Сулейманан районда «АлиЯк» компанияди, вири патарихъай фикирда кьуна, уьмуьрдиз кечирмишзавай инвестицийрин проект Инвестицийрин сад лагьай «КукIуш» премиядиз («Хуьруьн майишатда уьмуьрдиз кечирмишзавай виридалайни хъсан инвестицийрин проект» номинацияда) лайихлу хьанва, хабар гузва РД-дин хуьруьн майишатдин ва недай суьрсетдин министерстводи.
Премия вахкунин шад мярекат 15-июлдиз Грозный шегьерда Кавказдин инвестицийрин форумдин сергьятра аваз, кьиле фена. Ана РФ-дин Гьукуматдин Председателдин заместитель, энергетикадин месэлайрай пешекар, Кеферпатан Кавказдин федеральный округда куратор Александр Новака иштиракна.
Къейдзавайвал, «КукIуш» премия Россиядин регионрин инвестицийрин мумкинвилер гегьеншарунай гузва.
«АлиЯк» ООО-дин 1,3 миллиард манатдин къимет авай проектдин бинеда алай аямдин некIединни суьрсетдин ферма арадал гъун ава. Кьилди къачуртIа, проектдин сергьятра аваз, карханада калер хуьдай, данаяр хадай, калер ацадай кьилди чкаяр, некIедин блок ва малари сейр ийидай майданар арадал гъидайвал я.
Карханади вилик маларин кьадар артухарунин месэла эцигнава: некIедин жинсинин калерин кьадар — 400-дав, якIун жинсининбур — 1,5 агъзурдав, куьлуь карч алайбурун кьадар — 5 агъзурдав ва балкIанрин — 200-дав агакьардайвал я.
Амина Муслимова
