И йикъара Докъузпара райондин администрацияда чпин гуьгьуьллувилелди СВО-да тапшуругъар кьилиз акъудиз гьазур 2 жегьилдихъ галаз гуьруьш кьиле фена. Идакай чаз «Голос Эренлара» изданиди хабар гана.
Дяведин махсус серенжем кьиле физвай мулкара Ватандин итижар хуьн патал икьрарар кутIуннавай Г.Сафароваз ва А.Бабалаеваз Докъузпара райондин регьбер Мегьамед Шамилова мягькем сагъвал, къуватрихъ инанмишвал хьун ва, сагъ-саламат яз, гъалибвал гваз кIвалериз хтун алхишна.
«Ватан хуьнин барадай сагълам жегьилри кьабулзавай къарарар еке гьуьрмет авуниз лайихлубур я. Чи районда, республикада, уьлкведа чпин хушуналди дяведин гьерекатра иштиракдай къаст авайбур хьунал чна дамахзава», — лагьана М.Шамилова.
Алава хъувурвал, гуьгьуьллувилелди махсус серенжемда иштиракзавайбурун хизанар чкадин гьукумдин патай куьмек авачиз амукьдач.
Малум тирвал, дяведин махсус серенжемда иштиракзавайбуруз, абурун хизанриз государстводи вири жуьредин куьмекар гузва. Гуьгьуьллубурун жергейрик экечIиз кIанзавайбурувай яшамиш жезвай чкадин военный комиссариатдиз физ жеда.
Чи мухбир
