Гьакъи хкаж жеда
Махачкъалада маршруткайра рекьин къимет виликан 27 манатдилай 32 манатдал кьван хкаж жеда. Меркездин улакьдин управленидал асаслу яз, идакай «Дагъустан» РИА-ди хабар гузва.
Управленидин делилралди, улакьрин тешкилатри рекьин къиметар хкажунин игьтияж арадал атун машинрихъ гелкъуьнин къиметар хкаж хьунихъ ва маса харжийрихъ (ГСМ, шоферриз мажибар гун) галаз алакъалу тирдакай лугьузва.
Хабар гузвайвал, тариф хкажунин месэла сифте яз алай йисан апрелдиз веревирднай. И кардиз талукь яз са шумуд совещание кьиле тухванай. Анрал тешкилатри (инсанар санай масаниз тухунин кIвалах меркезда ирид тешкилатди кьилиз акъудзава) генани еке, амма, абурун фикирдалди, экономикадин жигьетдай бинелу къиметар тайинарун истемишзавай. Нетижада алай йисан июлдин вацралай рекьин гьакъидин къимет 32 манат жеда.
Управленида къейдзавайвал, улакьдин компанияр рейсера къекъведай машинрин кьадар артухариз гьазур я, амма абуруз шоферар бес жезвач. Хабар гузвайвал, и хиле зегьмет чIугвазвай ксар мажибар тIимил тирвиляй хъфизва. Алай тарифрин сергьятра авазни компанийривай шоферриз еке гьакъи гуз жезвач.
Чешмеди гъизвай делилралди, алай вахтунда Махачкъала шегьерда гьар юкъуз 1 агъзурдав агакьна маршруткайри кIвалахзава.
Эхиримжи пуд йисуз
Дагъустанда гьар йисуз энергия ишлемишунин кьадар артух жезва. Идакай РД-дин энергетикадин ва тарифрин министр Марат Шихалиева хабар гузва.
Адан гафаралди, анжах эхиримжи пуд йисуз республикада энергия ишлемишунин кьадар 25 процентдин гзаф хьанва.
Гьа са вахтунда, министрди хиве кьурвал, энергия арадал гъизвай объектри республикада истемишзавай кьадардин анжах са пай таъминарзава. Къейдзавайвал, алай йисан 1-кварталдин нетижайралди, Дагъустандин электростанцийри 1 млрд 110 млн «кВт.ч.» энергия арадал гъанва. Им, алатай йисан рекъемрив гекъигайла, 84 млн «кВт.ч.» -дин гзаф я.
Ведомстводи хабар гайивал, гужлувилин эксиквал (дефицит) тIимиларун патал республикада ракъинин ва гарун цIийи станцияр эцигун, гьакIни алай вахтунда «РусГидродин» филиалдин кIвалахзавай ГЭС-рал гидрогенераторрин гужлувал артухарун пландик кутунва.
ХъуьтIуьз гьазурвал
Махачкъаладин электросетар хъуьтIуьз гьазурун патал саки 1 миллиард манат пул чара ийида. Идакай, ОАО «Махачкалагорэлектросети» компаниядин кьилин инженер Саид Лачинован гафарал асаслу яз, «Дагъустан» РИА-ди хабар гузва.
Адан гафаралди, кьилди къачуртIа, 2024-2025-йисан зулунни хъуьтIуьн муддатда РД-дин электросетрин комплексдин гьазурвал аквадай программа уьмуьрдиз кечирмишун патал 972 миллион манат чара авун пландик кутунва.
Вилив хуьзва, амма…
Уьлкведин са жерге регионра 2024-йисуз гатун халийринни къарпузрин къиметар лап агъа кIан 15 процендин хкаж жедайди вилив хуьзва. Идакай «Дагъустан» РИА-ди хабар гузва. Амма уьлкведин хуьруьн майишатдин министерстводин делилралди, уьлкведин кьиблепата гьаваяр зегьембур хьуни халийрин бегьердин кьадардиз ва къиметриз таъсирдач.
Ведомстводи гьакIни къейдзавайвал, халияр гьасилунал гьалтайла, Дагъустан кIвенкIвечи регионрикай сад я.
Агентстводи кхьизвайвал, 2024-йисуз Дагъустанда винидихъ чпикай ихтилат физвай майваяр цанвай мулкарин кьадар тахминан 20 процентдин артух хьун мумкин я. Абур 8,5 агъзур гектардилай гзаф майданра цада.
Чешмедин делилралди, 2023-йисуз республикада 224 агъзур тонндилай гзаф халияр кIватI хъувуна. 2022-йисан бегьердин кьадардив гекъигайла, им 20 процентдин гзаф я.
Кьадар гзаф жезва
Ишлемишзавай газдай гьакъи гун патал онлайн-сервисдикай менфят къачузвай дагъустанвийрин кьадар гзаф жезва. Идакай «Дагъустан патал газ» телеграм-каналди хабар гузва.
Чешмеди къейдзавайвал, анжах са апрелдин вацра «Мой газ» приложенида республикадин 9 агъзурдалай гзаф агьалияр регистрация хьанва. Санлай къачурла, «мойгаз.смородина.онлайн» ресурс ишлемишзавай агьалийрин кьадар 140 агъзурдалай виниз акъатнава.
«Газпром межрегионгаз Махачкала» компаниядин генеральный директор Ризван Мурадова къейдзавайвал, ишлемишзавай энергиядин такьатдай комиссия галачиз гьакъи гун, электронный къайдадин квитанция къачун, счетчикдин рекъемар агакьарун — ибур вири винидихъ ихтилат физвай сервисдикай менфят къачунихъ авай артуханвилер я.
Чешмеди гьакIни хабар гузвайвал, газдин гьакъи гун патал герек тир «Газ онлайн» мобильный приложение «App Store» платформадай жагъида.
Гьазурайди — Муса Агьмедов
