Спортдиз еке фикир гузвай, жегьилар и рекьел желбунин карда агалкьунар авай Ариф Гьафизов Кьиблепатан Дагъустандин спортдин алемда вирибуруз сейли тренер я. Алатай са шумуд йисуз адан регьбервилик кваз спортдин милли ва маса жуьрейрал машгъул хьайи жегьилрикай къе гъалибчияр, чемпионар, спортдин мастерар хьанва. Мисал яз, путар хкажунай кьиле физвай акъажунра адан командади гьар йисуз 1-чка кьазва.
Мукьвара РД-дин физический культурадин ва спортдин министр Сажид Сажидова Дагъустан Республикада спорт вилик тухуник еке пай кутунай Ариф Гьафизоваз Разивилин чар гана. Къейд ийин, министерстводин патай ихьтин шабагьдиз ам идалай виликни лайихлу хьанай.
Тренер-муаллим яз кIвалахзавай Ариф Гьафизов Докъузпара райондин Мискискарин хуьряй я. Ада вичин кIвале чкадин жегьилриз спортдал машгъул жедай мумкинвал гузвай спортзал арадал гъанва. И спортзалдай акъатай пагьливанри армрестлингдай, кьуршахар кьунай, путар хкажунай ва спортдин милли маса жуьрейрай республикадин дережада кьиле физвай акъажунра агалкьунар къазанмишнава.
Жегьил пагьливанриз чешне къалуруналди, А.Гьафизова вичини гьар жуьре акъажунра иштиракзава, гъалибвилер къачузва. Чаз адахъ ва адан гуьзчивилик кваз спортдал машгъул жезвайбурухъ мадни еке агалкьунар хьана кIанзава.
К. Ферзалиев
