18-майдиз Каспийскда художественный гимнастикадай кьиле фейи рес­публикадин турнирда, яшарин са шумуд категориядиз пай хьана, аялри­ чпин алакьунар къалурна. Вичин ери-бине СтIал Сулейманан райондин ЦIа­рахрин хуьряй тир, алай вахтунда Махачкъалада яшамиш жезвай Наира Нисредовади 6 йис хьанвай аялрин арада 1-чка кьуна. Идалай виликни са шумуд акъажунра гъалибвилер къазанмишнавай адахъ галаз чаз редакцияда мукьувай таниш жедай мумкинвал хьана.

Н. Нисредова Р. Гьамзатован тIвару­нихъ галай ДГПУ-дин муаллим Насрудинан хизанда 2018-йисуз дидедиз хьана. Алай вахтунда Наиради «Акбарс» клубда­ тренер Ралина Кутланбеговадин­ гъилик­ вичин устадвал хкажзава. Ху­до­жест­вен­ный гимнастикадал ам машгъул жез 2 йис я. Наиради рикIел хкизвайвал, сифте­гьан агалкьун ада спортдин и жуьредал машгъул жез са тIимил вахт алатай­ла, къазанмишна. ИкI, Каспийскда, Къ. Къу­рамегьамедован тIварунихъ галай «Энергия» СШОР-да шегьердин ачух кIвен­кIвечивал патал кьиле фейи акъажунра ада 1-чка кьуна. Гуьгъуьнлай клуб­рин арада кьиле фейи акъажунрани вичин артуханвал субутна. Апрелдин вацра­ Нальчикда СКФО-дин кIвенкIвечивал патал кьиле фейи акъажунра 450-далай­ виниз аялри иштиракна. Наиради­ 2018-йисуз ханвай аялрин арада кIвен­кIве­чи­ви­лин тIвар къазанмишна.

Н. Нисредова аялрин бахчадиз физва. Анани ада вич гзаф активнидаказ тухузва. Бахчада тешкилзавай шад межлисра ада шиирар кIелзава, спортдин серенжемрани викIегьдаказ вичин алакьунар къалурзава. Чаз мадни чир хьайивал, Наира кьетIен бажарагъ авай аялар патал музыкадин М. Кажлаеван тIварунихъ галай школада скрипкадал машгъул жез са йис кьван я.

Къуй чи гъвечIи ва чIехи пагьливанрихъ дуьньядин спортдин кесерлу майданра мадни еке агалкьунар къазанмишдай къуватар хьурай!

Рагнеда Рамалданова