Кьве кас кьуна
Дагъустандин полициядинни РФ-дин ФСБ-дин РД-да авай управленидин къуллугъчийри санал кьиле тухвай серенжемрин вахтунда 36 ва 41 йисарин яшара авай, къанунсузвилелди наркотикар ишлемишуник шерик тир Махачкъаладин 2 агьали тайинарна. Идакай чаз РД-дин МВД-дин пресс-къуллугъди хабар гана.
Шак фенвайбур яшамиш жезвай чкада абур кьилди-кьилди ахтармишунин нетижада гзаф кьадарда набататдин наркотикар дуьздал акъатна ва абур вахчуна. Махсус ахтармишунри къалурайвал, вахчурди 572 грамм марихуана тир.
Кьунвайбур дустагъ авунин серенжем хкянава. Тахсиркарвилин лишанриз килигна, РФ-дин УК-дин 30-статьядин 3-паюнай ва РФ-дин УК-дин 228.1-статьядин 4-паюнин «п, г» пунктарай, РФ-дин УК-дин 228-статьядин 2-паюнай уголовный дело къарагъарнава.
Къуллугъдикай менфят къачуналди
Дагъустандин МВД-дин УЭБиПК-динни РФ-дин ФСБ-дин РД-да авай управленидин къуллугъчийри санал тади серенжемар кьабулунин нетижада Дербент шегьердин медицинадин са идарада лутувилиз рехъ ганвай делил дуьздал акъудна.
Ахтармишунрин делилралди, азарханадин кьили, 59 йисан яшда авай Дербентдин агьалиди, вичин къуллугъдикай менфят къачуналди, 60 йисан яшда авай карчидихъ галаз гафар-чIалар садна, гуя медидарадин кабинетар дезинфекция, дезинсекция ва дератизация авунвайвилин къуллугъар кьилиз акъуднава лагьана, актара тапан малуматар къалурна.
Дуьздал акъуднавай делилри къалурзавайвал, 2 380 000 манатдин зиян хьанва.
Ахтармишунар давам жезва.
«Лезги газет»
