Вилериз аквазвай къенин гьакъикъат я: Россиядихъ галаз дуствилин, амадагвилин алакъаяр хуьзвай уьлквеяр гьина аватIани, США-ди абур кIеве твадай, анра къизгъинвал арадал гъидай, гьатта «хъипи» инкъилабарни тешкилдай, кьилиз чпин гафуна авай хаинар гъидай сиясат тухуз хейлин йисар я.
Са тIимил кьулухъ хъфена, рикIел хкин США-ди Вьетнамда, ахпа Афгъанистанда тухвай дявеяр. Сириядин президент тахтунай гадарун, гьукум чпин итимрин гъиле тун патал США-ди аниз международный террористрин дестеяр рекье туна, Россияда къадагъа авунвай ИГИЛ (запрещенная на территории России организация) арадал гъиз куьмекна. Россиядин куьмек вахтунда агакь тавунайтIа, Сирия барбатIнавайди тир.
Ингье гила Украинадихъ галаз алакъалу Россиядиз акси план кьилиз акъат тийиз акурла, США-ди Мукьвал тир РагъэкъечIдай пата дяведин цIай кутунва. Ам мадни къати ийидай сиясатдал элячIнава. Израилдин кьилелай зарпанд алатнава, са куьникайни къурху авачиз, Сириядин, Иракдин, Ливиядин, Йемендин мулкар ракетайрай язава. ИкI, Сирияда авай Ирандин посольстводин дарамат ракетайрай яна, инсанар телефна. США-ди лагьайтIа, Израиль са къатда яракьралди, долларалди таъминарзава.
Иран вичиз муьтIуьгъариз кIанзавай США-ди фадлай адаз тарс гудай, кар кьадай уламар язавайди тир. Квачир тахсирар кутаз, Ирандал бомбайрин хар къурда лугьудай малуматар чукIуриз, датIана къурхуяр гузвай. Гила США-ди Ирандал Израиль гьалдарнава. Гафарай вич и кардиз акси я лугьузватIани, США-ди Израилдин тереф хуьзва. Лап и йикъара Израилдиз са миллиард доллар чара авунва. Ада Палестинадин агьалияр тергдайвал, хуьрер, шегьерар харапIайриз элкъуьрдайвал.
Чпин гафуна авачир, макьамдал кьуьл тийизвай гьукуматрив эгечIзавай тегьер сад я: вири рекьер-хуьлер, пулар ишлемишиз, чкадин халкьар гьукумдиз акси акъвазарун, анра «хъипи» инкъилабар тешкилун. Гьатта чпиз хуш авачир политикрин чандиз къаст авун.
Мисаларни тIимил авач. Сербияди Россиядихъ галаз дуствилин, амадагвилин алакъаяр хуьзва лугьуз, США-дини Евросюзди аслу тушир государство вири патарихъай кIеве твазва. Адал Албания гьалдарзава.
Украинада цIай кутунвай дяве акъвазаруниз, миллетбазар яракьралди, пуларалди таъминар тавуниз эвер гузвай Венгриядин, Словакиядин, Китайдин регьберар аквадай вилер авач. Анриз чпин эмиссарар, векилар ракъуриз, Россиядиз акси сиясат тухунин теклифар гуз ава.
США-дин, РагъакIидай патан демократия гьихьтинди ятIа мадни успат хьана. Садалайни аслу туширвилин сиясатдал амалзавай Словакиядин премьер-министр Роберто Фицодин чандиз Гандлово шегьердин агьалийрихъ галаз гуьруьшмиш жезвай вахтунда къаст авуна. 71 йисан яшда авай Юрий Цинтула ам вад гуьлледив яна. Садни шаклу туш, Роберто Фицо ада тухузвай сиясат себеб яз арадай акъудиз кIанзавай.
Вири инсаният чпин куьлгедик, гъуьнтIуьник кутуна, маса уьлквейрин девлетрин гьисабдай яшамиш жез кIанзавай «азад демократиядин» нахайрин, аждагьанрин, жанавуррин крар гьа ихьтин алчахбур, инсафсузбур я. Къе дуьньядин гзаф уьлквейрин регьберар, халкьар агъунва: США-ди, коллективный Западди тухузвай сиясатдихъ хъсан эхир жедач.
Абад Азадов
