Донбассдин мулкар, шегьерар, хуьрер ва пуд миллиондилай виниз агьалияр Украинадин миллетбазрикай, неонацистрикай­, цIийи фа­шистрикай азад авун па­тал кьиле тухузвай дяведин махсус серенжем давам жезва. Йи­къалай-къуз Россиядин оборонадин министерстводи чи Яракьлу Къуватрин агалкьунрикай, азад­­за­вай хуьрерикай, шегьеррикай­, душмандин тергзавай кьван ас­керрикай, техникадикай хабар гузва. Са рахунни алач, ихьтин нетижаяр арадал гъизвайбур Россиядин армиядин викIегь, жуьрэтлу, дирибаш командирар ва аскерар я. Абуру гьар са женгина руьгьдиз мягькемвал, зиреквал къалурзава, командирри­ ви­лик эцигзавай тапшуругъар къагь­­­риманвилелди тамамарзава ва гъалибвилер арадал гъизва.

Ихьтин кьегьалрин жергейра сифте нубатда Дагъустандин халкьарин векиларни ава. Къе чаз малум тирвал, Дагъларин уьлкведин жуьрэтлу 11 хва Россиядин Федерациядин Президент Владимир Путинан Указдалди Россиядин Игит лагьай баркаллу тIварцIиз лайихлу хьанва. Баркалладин орденралди, медалралди къейднавай дагъустанвийрин кьадар са шумуд вишев агакьнава.

Ватандин аслу туширвал, итижар, агьалийрин азадвал хуьн патал чпин чанарни гьайиф текъвезвай кьегьалар гьамиша рикIел хуьн, абуруз ва абурун хизанриз­ галайвилер авун, куьмекар гун чи буржи я. Гьа ихьтин фикир аваз, «Дагестанская правда» газет­дин библиотека» лишандик кваз редакцияди «Гъалибвилин малаи­кар СВО: Дагъустанвияр — Рос­сия­дин Игитар» тIвар алай (автор — Надежда Тузова) ктаб гьазурна, акъуднава. «Дагестанская правда» газетдин редакцияда и ктабдихъ галаз танишарзавай мярекат кьиле фена. Ана Дагъустандин Жемиятдин палатадин, Агъса­къалрин Советдин, военкоматрин векилри, РД-дин информациядин ва печатдин агентстводин регьбер Абдуразакь Жамалдинова, «Да­гъустан» издательстводин директор Умарусман Гьажиева ва печатдин изданийрин, телеканалрин векилри иштиракна.

«Дагестанская правда» газетдин кьилин редактор Бурлият Токболатовади къейд авурвал, ктаб Ватандин ЧIехи дяведин баркаллу къагьриманрин крар, адетар дава­марзавай алай аямдин игитрин кьегьалвилериз бахшнава.

— Ктабдин кьилин тема ватанпересвал я, — лагьана Надежда Тузовади. — Ватандин ЧIехи дяведилай инихъ 80 йис алатнаватIани, адан къурбандар, иштиракчияр, нетижаяр, Советрин Союздин халкьарин, Яру Армиядин зегьметар­, агалкьунар, гъалибвилер чи рикIе­ра эбеди яз амукьда. Абурулай чешне къачуна, къенин чи несилди Россиядин итижар, азадвал, ас­лу туширвал хуьн патал фа­шизм­дин цIийи терефдаррихъ, миллет­базрихъ галаз, чанарин гьайифни татана, кьегьалвилелди­ женг чIугвазва ва гьейранвалдай игитвилер къалурзава. Абур рикIел хуьн, абурун игитвилерикай алай ва къвезмай несилризни чирун, тарихда абурун гел амукьдайвал авун чи буржи я. Ктабда Россиядин Игитвилин тIварцIиз лайихлу хьанвай Дагъустандин 9 Игитдикай (Нурмегьамед Гьажимегьамедовакай, Энвер Набиевакай, Эседулла Абачевакай, Руслан Къурбановакай, Исрафил Мегьамедо­вакай, Михаил Абраменкодикай, Шамиль Мегьамедовакай, Темирлан Абуталимовакай, Залибег Амаевакай) очеркар ава. Абурал мадни кьве Игит алава хъхьанва.  Са рахунни алач, абурни ктабдин  нубатдин изданида гьатда».

Авторди игит рухвайрикай, абурун уьмуьрдикай, яшайишди­кай, махсус серенжемда иштира­кай женгерикай гегьеншдиз, итиж­лудаказ, кIелзавайдаз таъсирд­ай­вал кхьенва. Виридакай тахьай­тIа­ни, чепиви игитдикай ктабда­ ганвай са бязи  къейдер гъиз кIан­зава.

«Танкист Энвер Набиева вичиз Дагъус­тандихъ галаз алакъа­лу лакIаб (позывной) къачунвай. Душмандин далу патаз физ, миллетбазриз ада кьазвай ягъун­ри­кай кьве патазни хабарар чкIиз­вай. Майордин жуьрэтлувал, викIегь­вал тешпигь авачирди тир. Ам вуж ятIа чириз кIанзавайбурни тIимил тушир. Иллаки — душмандин пата. Гьатта адан кьилихъ еке шабагьни хиве кьунвай. Къагьриман танкистдин саламатвал хуьн патал адав вичин лакIаб дегишариз туна…»

Февралдин вацран сифте женгерикай сад тир. Набиеван батальондин тактикадин дестедиз, тайинарнавай чка кьуна, чи час­тариз виликди фидай мумкинвал­ яратмишунин тапшуругъ ганвай. Миллетбазри вири рекьерик минаяр кутунвай. Вилик квай пуд машин хъиткьинна. Ахпа вилик танк кутуна ва муьгъ кьуна. Танкист­ри душмандин 3 БМП ва хейлин аскерар тергна. Са тIимил вилик хъфенмазди, чибур чинеба гуьзетзавай миллетбазрал ацалтна. Цавайни вертолетди чи танк яна. Батальондин аскерар гьалкъада гьатна, командирдални хер хьанвай. Идакай хабар хьайила, Энвер Набиев, бронетранспортерда аваз, гьалкъада авайбуруз куь­мекдиз фена. Юлдашрин куьмекни галаз миллетбазар къирмишна. Набиева эвер гайи вертолетда аваз хирер хьанвайбур хутахна. Майор вичин дестени галаз душмандин далу пата акъвазна. Миллетбазри абур кьун патал хейлин алахъунар авуна, амма са затIни алакьнач. Гена чибуру зениткадай Украинадин истребитель яна, гадарна.

Душмандин далу пата женг чIугуникай Энвер Набиева икI рикIел хкизва: «Вад суткада чи патав садавайни къвез хьанач. Кьуд патан рекьерни ВСУ-дин миллетбазри кьунвай. Кудайди, недайди куьтягь жезвай. Душмандин диверсантар са шумудра чун тергиз, есирда кьаз алахъна. Чна абур къирмишна. Чун алай квадрат датIана тупарайни язавай. ГьакI чи винел бомбаярни вегьезвай. ИкI амукьайтIа, чи гьал писди жеда,- лагьана за юлдашриз,- чна неонацистрал гьужумна кIанда. Йифен кьуларилай алатайла, чун танкара аваз абурун частуниз гьахьна. Хурук акатай вири дараматар, дзотар, техника барбатIна. Малум хьайивал, чилин кIаникни машинривайни гьерекатиз жедай чкаяр квай. Ракьун варар кукIварна, чун кьве бункердиз гьахьна. Есирда гьатай неонацист чна чпинбурун патав ракъурна ва абуруз, гъилер хкажна, экъечIун теклифун буйругъна. ТахьайтIа, чеб гьа бункерда, чан аламаз, кудайдакай хабар це лагьана. 68 кас чна есирда кьуна. А чка командиррин чилин кIаник квай запасдин пункт тир кьван…»

Миллетбазрин винел гъалибвилер къачузвай чи игитрин женгерикай ктабда ганвай ва икьван гагьда гзафбуруз малум тушир агьвалатар, делилар гзаф я. Абуру Дагъустандин уьтквем рухваяр викIегьбур, жуьрэтлубур, военный искусство хъсандиз чизвайбур, командиррин тапшуругъар зирекдиз, дирибашдиз тамамарзавайбур тирди гьакъикъидаказ успатзава.

Ктабдин кьвед лагьай паюна «Дагестанская правда» газетдин журналистри СВО-дин маса иштиракчийрикай кхьенвай макъалаяр, очеркар ва абурун шикилар гьатнава.

РД-дин информациядин ва печатдин агентстводин регьбер Абдуразакь Жамалдинова СВО-дин Игитрин крар, кьегьалвилер ри­кIел хуьнихъ еке метлеб авайдакай лагьана.

Мярекатда иштиракай РД-дин Жемиятдин палатадин председатель Азизбег Черкесова, Агъ­са­къал­рин Советдин векил Иб­ра­гьим­ Ибрагьимова, «Дагъус­тан»­ издательстводин директор Ума­русман Гьажиева акьалтзавай несил ватанпересвилин руьгьдаллаз тербияламишунин карда ктабдихъ еке метлеб жедайди къейдна. Гьавиляй адан кьвед лагьай издание гзаф тираж аваз ахкъудунин тек­лифни гана.

Игит рухвайриз баркалла!

Нариман  Ибрагьимов