Чи йикъара акьалтзавай несилрин векилар хайи чIалал са акьван хъсандиз рахан тийизвайди виридаз малум я. Неинки са шегьерра, гьакI хуьрерани жегьилар урусдал рахаз алахъзава. Зи фикирдалди, и карда сад лагьай тахсиркарар диде-бубаяр я. Эгер икI давам хьайитIа, чIалан кьисмет хаталувилик акатда.
За Москвада авай гьуьрметлу са лезги хизандихъ галаз алакъаяр хуьзва. И хизанда гьамиша лезги чIалал рахада. Шегьердин чкада, вични Москвада, ихьтин хизанар тек-туьк я.
Заз Москва шегьерда Мегьамед ва Сабина Арабоврин хизанда чIехи жезвай Рашидакай ихтилатиз кIанзава. Адан кIуьд йис я, ада 3-синифда вири вадар аваз кIелзава. Мектебда ам виридаз чешне яз гъизва. Яшдиз бицIи ятIани, руьгьдиз лигим Рашид какахьай жуьредин акъажунра иштиракзавай спортсмен я. Адахъ и рекье са кьадар гьунарарни ава. Гьелбетда, викIегьвал къаст хьайила жеда. Рашидахъ гзаф къастар ава. Ам датIана са квел ятIани машгъул жезва, гьатта кьецепатан чIаларни чирзава. КIвале ам диде-бубадин бицIи куьмекчини я.
Заз хуш хьайи кар ам я хьи, Рашид кIвале лезги чIалал рахазва, иллаки — Иминат бадедихъ галаз. Гатфар алукьдайла, мус Вини Къурушдал хъфида лугьуз, адан рикI акъатда. Гьар сеферда хуьруьз хтайла, адаз лезги цIийи гафар чир жезва, виликдай вил акьун тавур са гуьзел пIипI аквазва, инсанрин арада авай рафтарвилер кьатIузва.
Рашидал эцигнавайди адан чIехи бубадин тIвар я. Арабов Рашид бажарагълу алим тир. Уьлкведин хуьруьн майишатдин министерствода кIвалахзавай йисара адал еке везифаяр ихтибарнавай. Гьайиф хьи, кьисмет ахьтинди хьана хьи, ам и дуьньядай фад хъфена. Амма хизанда ам гьамиша сагъ я.
Рашидан диде Сабинадин чIехи буба, къурушви алим, экономикадин илимрин доктор, РФ-дин илимрин лайихлу деятель Гьажиев Абдулмежид Абдуллаевича ДГУ-дин экономикадин факультетдин кафедрадин заведующий яз пара йисара кIвалахнай. Лезги халкьдин арада адахъ еке гьуьрмет авай. АмайтIа, гьелбетда, адани вичин хтул бицIи Рашидал дамахдай.
Гад атайла, Арабоврин хизанар хайи ерийриз хквезва. Ина Рашида чIехи бубайрин сурарал кьил чIугвада, вичин таяр-туьшерихъ галаз къугъвада, чIехи бадедивай вичиз течир крарин сирер чирда. Къурушдал сиягьат куьтягь хьайила, ам бадедин ватандиз — Цмурдал хъфида. Инин тIебиатни Рашидаз пара хуш я. Хъфидай вахт хьайила, рикIе цIийи къастар, экуь фикирар аваз, ам меркездиз рекье гьат хъийида… Къуй ам еке дережайрив агакьрай!
Бикеханум Алибегова
