И йикъара чи арадай 85 йисан яшда аваз алим, философиядин илимрин доктор, ДГУ-дин профессор, РД-дин илимрин лайихлу деятель, РФ-дин высший школадин лайихлу къуллугъчи Омар Межидович Гьуьсейнов акъатна.
О. М. Гьуьсейнов 1939-йисан 5-сентябрдиз Ахцегь райондин КьакIарин хуьре дидедиз хьана. Юкьван мектеб къизилдин медалдалди акьалтIарай жегьилди Армавирдин пединститутда кIелна. Зегьметдин рехъ Смугъулрин 8 классдин мектебда завучдин везифаяр тамамарунилай гатIунна. Гуьгъуьнлай ВЛКСМ-дин Ахцегь РК-дин мектебрин отделдин заведующий яз кIвалахна, Советрин Армиядин жергейра къуллугъна.
1968-йисуз Омар Гьуьсейнова вичин уьмуьр илимдихъ галаз алакъалу авуна: ам ДГУ-да аспирантурадиз гьахьна. Философиядин илимрин кандидатвилин диссертация агалкьунралди хвена. Алакьунар авай жегьил алим вузда ассистент яз амукьна. Гьа чIавалай вичин уьмуьрдин эхиримжи йикъалди алимди республикадин кьилин вузда зегьмет чIугуна.
Омар Межидовичан къелемдикай 180-дав агакьна илимдин кIвалахар, гьабурукай яз 9 монография, 15 учебный пособие хкатна. Адан илимдин макъалаяр урус, ингилис, немс, френг, испан чIаларал чапнава.
Омар Гьуьсейнов Международный информатизациядин академиядин академик, Дагъустан Республикадин государстводин премиядин лауреат тир. Ам кьве сеферда государстводин илимдин стипендиядиз лайихлу хьана. Кембридждин международный биографический центрадин къарардалди О. Гьуьсейнов «XX асирдин виридалайни бажарагълу 2000 алим» ктабдик кутунай ва адан агалкьунар махсус дипломдалдини медалдалди къейднай.
Машгьур алим хьиз, Омар Межидович хъсан хизандин кьил, чIехи ватанперес, гьикаятчи, шаир, «Лезги газетдин» редакциядихъ галаз фадлай алакъаяр хуьзвай авторрикай сад тир. Адан цIудралди гьикаяяр, макъалаяр республикада хайи чIалал акъатзавай периодикадин изданийра чапна, кьилдин ктабра гьатна. Махачкъалада лезги халкьдиз талукьарна кьиле физвай гьар са мярекатда Омар Гьуьсейнов аквадай. Ада чи миллетдин тIал алай месэлаяр къарагъарзавай ва абур гьялунин кардик вичин пайни кутазвай.
«Лезги газетдин» редакциядин коллективди Омар Межидовичан вири хизанриз, мукьва-кьилийриз, дериндай хажалат чIугунивди, башсагълугъвал гузва. Алимдин экуь къамат чи рикIера амукьда.
