Дагъустанда Сергей Меликован­ Указдалди «XX асирдин Гомер» СтIал Сулейманан тIварцIихъ галай го­су­дарстводин премия тешкилнава (ара­дал хканва). Премия конкурсдин бинедаллаз кьве йисалай са сеферда кьве номинациядай гуда:

шииратдин эсеррин бажарагълу авторриз;

Дагъустандин чIалариз эсерар таржума ийизвайбуруз.

Премиядин кьадар 150 агъзур манат я. Конкурсда иштиракун патал кандидатар жемиятдин тешкилатривай, вузривай, газетринни журналрин редакцийривай, гьукумдин органривай теклифиз жеда.

РикIел хкин, СтIал Сулейманан тIвар­цIихъ галай премия Советрин девирда кардик квай. Амма са кьадар вахтар арадай фейила, и премия мад гун хъувунач. Адан лауреатрин арада Расул Гьамзатов, Алирза Саидов, Аткъай Аджаматов, Ханбиче Хаметова, Яков Козловский, Рашид Рашидов ва масабур ава.

Къейд ийин хьи, алатай йисан декабрдин вацра Дагъустандин писателрин Союзда кьиле фейи совещанидал «Лезги газетдин» кьилин редактор Мегьамед Ибрагьимова шаирдин 155 йис къейдзавай йисуз и премия арадал хкунин теклиф ганай. Дагъларин уьлк­ведин яратмишдай интеллигенцияди теклиф хушдиз кьабулнай ва республикадин Кьилин тIварцIел и месэладиз талукь чар рекье тунай. ЧIехи шаирдин юбилей къейдзавай йисуз­ адан тIварцIихъ галай премия арадал хкун лап кутугай кар хьана!

Чи  мухбир