Хизандин йис
СтIал Сулейманан райондин Курхуьруьз гьахълудаказ муаллимрин хуьр лугьузва. Анай муаллимрин неинки хизанар, тамам тухумарни акъатна. ИкI, мисал яз, Гьажиеврин тухумди 30-далай виниз муаллимар майдандиз акъудна. Чи къенин суьгьбетни муаллимрин Гьажиеврин тухумдай тир Курхуьруьн юкьван школадин директордин тербиядин рекьяй заместитель Уружбегова (Гьажиева) Лейла Максимовнадикай (шикилда) я.
…Х. Абовяна лагьай келимаяр рикIел къвезва: «Тама зурба мегъуьн тар гьалтда. Ам зурбади хьун адалай вичелай ваъ, ам экъечIнавай чилелай — накьвадилай аслу я. Эгер а тар руг, къван квай чкада экъечIнавайтIа, акьван зурбади жедачир».
Лейла Максимовна хуьре, районда гьуьрмет авай муаллим хьунни, са шакни алачиз, Гьажиеврин тухумдилай гзаф аслу хьана. ИкI, адан дах Максим Мегьамедовича, районда комсомолдин ва партийный кIвалахрал хьиз, хейлин йисара школайра директорвиле ва муаллимвиле зегьмет чIугуна. Дагъустан Республикадин муниципальный къуллугъдин лайихлу работник Максим Гьажиевакай 25 йисуз райондин собранидин депутат хьана.
Диде Фарида Нажмудиновнади (адан дах Нажмудин Жабраиловични муаллим тир), 1968-йисалай эгечIна, тамам 48 йисуз Курхуьрел муаллимвиле кIвалахна. Ам республикадин лайихлу муаллим я.
Пенсияда авай, алай йисан 25-мартдиз санал яшамиш жез 59 йис къейд авур Максим ва Фарида Гьажиеврихъ 4 велед (виридахъ кьилин образование ава), 10 хтул ва 5 птул ава.
Ихьтин чIехи ва гьуьрметлу хизанда 1974-йисуз дидедиз хьайи Лейла Максимовнадини тухумдин пеше давамарун дуьшуьшдин кар туш.
— Чи кIвале, хизанда гзаф вахтара жедай ихтилатарни школадикай, кIелунрикай тир, — лугьузва Лейла Максимовнади. — Дидени буба муаллимвилин пешедал ашукь тир, абуру и кардал дамахни ийидай. Ида зазни таъсир авуна, зун муаллимвилин кеспидал ашукьарна. Къе жувакай муаллим хьунал, тухумдин кар давамарунал ва жува тарсар гайи гадайрикайни рушарикай обществодиз вафалу инсанар хкатунал за дамахзава. Зи виликан ученикрикай къе чIехи дережайрин руководителар, алимар, муаллимар хъсан пешекарар хьанва. Им зи бахтлувал я.
Л. Уружбеговади къейдзавайвал, муаллим хьунин фикир адахъ гьеле школада сифтегьан классра кIелзавай йисарилай авай. 1991-йисуз Курхуьруьн юкьван школа акьалтIарай адакай сифтедай ана библиотекарь хьана. Гуьгъуьнлай ада Дагъустандин госуниверситетдин культурадин факультет «Библиотековедение и библиография» пешедай акьалтIарна. Л. Уружбеговади дуьньядин тарихдин ва ватандин культурадин программадай алава пешекарвилин гьазурлухвал, «Культура и традиции народов Дагестана» хиляй муаллимвилин пеше къачуна.
Лейла Максимовнади школада тарихдин, гьакIни культурадин ва Дагъустандин халкьарин адетрин муаллим яз кIвалахна. 2018-йисалай инихъ ада школадин директордин тербиядин рекьяй заместитель яз кIвалахзава.
Кьилин категориядин муаллим тир Л. Уружбеговади, хиве авай асул везифаяр намуслудаказ кьилиз акъудунилай гъейри, школадин, хуьруьн ва райондин общественный уьмуьрдани активвилелди иштиракзава. Кьилди къачуртIа, ам хуьре «Доброе сердце» («Регьимлу рикI») тIвар алаз тешкилнавай общественный организациядин советдин председатель яз 26 йисалай виниз я.
2022-йисалай инихъ Лейла Максимовнади Курхуьруьн сечкидин 1296-нумрадин участокдин секретарвилин везифаярни намуслудаказ кьилиз акъудзава.
Л. Уружбеговадин муаллимвилин яргъал йисарин намуслу зегьмет Россиядин Федерациядин ва Дагъустан Республикадин образованидин министерствойрин, СтIал Сулейманан райондин кьилин, райондин образованидин управленидин, школадин дирекциядин патай гзаф кьадар грамотаяр гуналди къейднава. Адахъ гьакIни жегьил несилдиз ватанпересвилин тербия гунай ва общественный кIвалахдай ганвай РФ-дин ЛКСМ-дин Центральный комитетдин Гьуьрметдин грамотани ава.
Лейла Максимовна ахалкь-низам авай 3 веледдин мегьрибан диде я. ДГУ-дин алишверишдинни экономикадин факультет акьалтIарнавай, алай вахтунда Курхуьруьн поселенидин депутатрин собранидин председатель тир Мурад Гьажибубаевичанни Лейла Максимовнадин веледрини кьилин образование къачунва, чпин пешейрай кIвалахзава.
ИкI, РФ-дин юстициядин министерстводин СКФ РПА акьалтIарнавай Диана Россиядин МВД-дин Ставрополдин крайда авай ГУ-да миграциядин месэлайрай управленида тешкиллувилинни методикадин отделда эксперт, Гьажибуба Махачкъалада духтур-ординатор, рентгенолог, Ю.А. Гагаринан тIварунихъ галай ВВС-дин Женгининни Гьавадин Академия акьалтIарнавай Самира Ленинграддин областда лув гудай аппаратар ишлемишунин рекьяй инженер я.
Хъсан муаллим, тербиячи, тешкилатчи Лейла Максимовнадиз хуьре, районда гьуьрмет ава.
— Гьажиеврин тухум неинки Курхуьрел, гьакI райондани чешнелубурукай сад я, — лугьузва вични курхуьруьнви тир райондин образованидин управленидин начальник Гьуьсейн Шихбабаева. — Баркаллу и тухумдай алимар, офицерар, чIехи дережадин гьакимар, жуьреба-жуьре пешекарар, абурукай яз хейлин муаллимар акъатнава. И тухумдин муаллимрин рехъ баркалла алаз давамарзавайбурукай сад я Лейла Максимовна. Ам райондин лап хъсан муаллимрин арада ава.
Малум хьайивал, алай йис Л. Уружбегова патал кьетIенди, юбилейдинди я. Тебрикдин, алхишдин келимаяр лугьунихъ галаз сад хьиз, чаз Лейла Максимовна Уружбеговадихъ кIвалахда мадни еке агалкьунар, хизанда хушбахтлувал, веледрикайни хтулрикай рикIин динжвал хьун кIанзава.
Хазран Кьасумов
