5-майдиз Ахцегь райондин Хуьруьгрин хуьре авай «Люминари» центрада Кьиблепатан Дагъустандин мектебрин 7-8-классра кIелзавай аялрин арада физикадай (асул фикир арадал хкиз жезвай энергетикадин месэладиз гана) олимпиада кьиле фена.
Мярекат мергьяматлувилин «Леки» фондуни, лезгийрин Федеральный милли культурадин автономияди (ФЛНКА) «ЭкоЭнерджи Групп» ООО-дин спонсорвилин куьмекдалди тешкилнавай.
Олимпиадада мектебра кIелзавай 54 аялди иштиракна. Абуру тамамарай кIвалахриз къимет физикадинни математикадин илимрин кандидат, МФТИ-дин муаллим Азим Нуьгьова гана.
Олимпиададин гьуьрметлу мугьманрин арада мергьяматлувилин «Просвещение» фондунин президент Магьмуд Абдулкеримов, «ЭкоЭнерджи Групп» ООО-дин гендиректор Артур Алибегов, «Лезги газетдин» кьилин редактор, Россиядин журналистрин Союздин Дагъустанда авай отделенидин председатель Магьамед Ибрагьимов, ФЛНКА-дин векил Садикь Гьасанов, «Леки» фондунин векил Закир Къагьриманов ва са жерге маса юлдашар авай.
7-классрин аялрин арада гъалиб хьана: Айша Ибрагьимова (1-чка, Рутулрин 1-нумрадин СОШ), Мирлан Насиров (2-чка, Мегьарамдхуьруьн райондин Филерин СОШ), Мадина Гьажиева (3-чка, Ахцегьрин 2-нумрадин СОШ), Амира Гьарунова (4-чка, Рутул райондин Шиназрин СОШ), Абдусамад Балаев (5-чка, Мегьарамдхуьруьн райондин Ярукьваларин СОШ).
8-классрин арада гъалиб хьана: Хизбуллагь Гъафизов (1-чка, Докъузпара райондин Мискискарин СОШ), Диана Гьуьсейнханова (2-чка, Мегьарамдхуьруьн райондин Билбилхуьруьн СОШ), Гьайдар Мисриханов (3-чка, Ахцегьрин 1-нумрадин СОШ), Мадина Вурдуханова (4-чка, Докъузпара райондин Миграгърин СОШ), Айша Къубаева (5-чка, Агъул райондин Тпигърин мектеб).
Олимпиададин гъалибчийриз ноутбукар, планшетар, ктабар, сифтегьан пуд чка кьур аялрин муаллимриз пулдин пишкешар гана. Артур Алибегова къейд авурвал, и олимпиада гьар йисуз кьиле тухудайвал ва къведай йисуз мадни гегьеншдаказ тешкилдайвал я.
Амина Муслимова
