Дербентда кардик квай 9-нумрадин “Бахтлу аялвал” тIвар алай бахчадиз 1998-йисалай инихъ  кьилин категориядин педагог, РФ-дин образованидин гьуьрметлу работник Гелин Абдуллаевади регьбервал гузва. Даггоспединститут акьалтIарнавай адахъ кIвалахдин 35 йисан тежриба ава.

Гелин Мегьамедрасуловна мукьувай чидай ксариз малум тирвал, школадилай виликан образованидин идарадин заведующийвал ам патал къуллугъ ваъ, яшайишдин жуьре я. Аялрин бахчада вири къуллугълчийриз къулай шартIар арадал гъун, диде-бубайри­ абурал чпин веледар ихтибарун патал анин регьберди, югъ-йиф талгьана, зегьмет чIугвазва. Гьа икI кIвалахун Гелин Абдуллаевади вич патал кьилин месэла яз гьисабзава. Гьавиляй “Бахтлу аялвал” бахчадин коллектив къе пешекарвилиз, зегьметкешвилиз гьуьрметзавай, вири месэлаяр санал гьялзавай са хизан хьиз я.

1981-йисуз Г.Абдуллаева шегьердин 16-нумрадин “Чебурашка” бахчадиз тербиячивиле кIвалахал кьабулнай. Ина ада вич хъсан пешекар ва инсан яз къалурна. Ада тешкилай мярекатар гьамиша итижлудаказ, тешкиллудаказ кьиле фидай. Ада вичин кIвалахда цIийивилер ишлемишзава, педагогвилин тежриба девлетлу ийизва.

КIуьд йисалай Гелин Абдуллаева “Мальвина” бахчадин заве­дующийвиле тайинарайла, ада вичин регьбервилин, тешкилат­чи­вилин вири ерияр къалурна, шегьердин конкурсра са шумуд се­фер­да сифтегьан ва кIвенкIвечи чкаяр кьуна, гьуьрметдин грамотайриз лайихлу хьана. КIвалахдин цIийи чкадал къалурай алакьун­рай адал “Бахтлу аялвал” бахчадин заведующийвал ихтибарна.

Исятда адан къаюмвилик кваз 19 касди  — ст. тербиячиди, педа­гог-психологди, музыкальный регьберди, физкультурадин инструкторди, логопед-дефектологди ва маса пешекарри кIва­лах­зава. Гзафбурухъ кьилин ва сад лагьай категорияр ава. Вири санлай аялрин и бахчада 46 касди кIвалахзава.

Дербентдин 9-нумрадин аялрин и бахча 1970-йисалай кардик ква. Ина 189 аял 7 дестедиз пайнава абуру чирвилер ва тер­бия къачузва. Ина гьар жуьредин кружокарни кардик ква. Аялри ва тербиячийри шегьердин конкурсра чпин алакьунар къалурзава, пешекарвилин суварар ва маса мярекатар къейдзава. Аялар икI ватанпересар яз тербияламиш жезва. Вири крарал гьам коллективди, аялрин ва абурун диде-бубайри, гьакI шегьер­дин администрациядин регьберрини къимет эцигзава.

Эдуард Багъишев