Алай йисан 1-августдилай кIвалахзавай пенсионерриз гузвай пулар артухарнава. Дагъустандин Пенсийрин фондунин пресс-къуллугъдай хабар гайивал, республикада кIвалахзавай 124687 кас пенсионерар ава. Страховой пенсийрин гьисабар кьун хъувун патал Россиядин Пенсийрин фондунин бюджетдай 2018-йисуз 10,7 миллиард манат чара авун къалурнава.

ЦIийикIа гьисабар кьан хъийидай пенсионеррин арада 2017-йисуз кIвалахдалди таъминарзавайбуру страховой взносар алава хъувунвай ва ганвай, чпи кьуьзуьвилин ва инвалидвилин пенсия къачузвайбур ава. “ЦIийикIа гьисабар кьун хъувунин серенжем гьар йисуз, арза галачиз, кьиле тухузва”, —  гъавурдик кутуна ОПФР-дин РД-да авай территориальный органди.

— Алава хъжедай пулдин кьадар гьар са касдиз кьилди-кьилди тайинарзава. И карда налогар ганвай мажибди еке роль къугъвазва. Виридалайни кьилин кьадарди, 2017-йисан гьисабралди, пенсийрин 3 балл, яни 235,74 манат тешкилзава, — алава хъувуна чешмеди.

РикIел хкин: 2017-йисан августдиз Пенсийрин фондуни 2016-йисуз кIвалахнавай пенсионеррин пулар хкажуниз 11,8 миллион харжна. КIвалахзавай пенсионеррин пул юкьван гьисабдалди 169 манатдин артух хьана. И категориядик акатзавайбурун пенсийрин индексация лагьайтIа, 2016-йисалай акъвазарнава.

Чи мухбир