«Газпром межрегионгаз Махачкала» ООО-дин муьштерийрин итижар фикирда кьуналди, газ ишлемишзавайбурухъ ва яшайишдин кIвалер газламишунин программадин иштиракчийрихъ галаз алакъа хуьн патал арада мензил авай къайдадин къуллугъар тешкилнава.
Муьштерияр патал са шумуд каналдикай ибарат телефонрин пулсуз алакъадин линия арадал гъанва. Адан куьмекдалди агьалийривай газ ишлемишунихъ галаз алакъалу яз арадал къвезвай вири суалриз жавабар жагъуриз жеда. «Алакъадин центради» газдин гьакъи гунихъ галаз алакъалу яз арадал къвезвай вири месэлайрин гъавурда твазва: аниз зенг авуна, кIватI хьанвай буржунин кьадардикай ва адан себебрикай, газдин кардик квай тарифрикай, гьакIни счетчик ахтармишдай вахт ва и кIвалах кьиле тухузвай къайда гьихьтинди ятIа, абонентвилин пункт (мулкунин участок) алай чка чириз жеда.
«Алакъадин центрадиз» кIвалахдин вахтунда (пакаман сятдин 9-далай нянин сятдин 6-далди), 8-800-200-98-04 нумрадай зенг авуналди, гьакIни газдин компаниядин векилри муьштеридиз тамамарзавай къуллугъдин еридикайни лугьуз жеда.
Дагъустандин агьалийрин — газдин муьштерийрин къулайвал патал «Газпром межрегионгаз Махачкала» ООО-дин сайтда — www.mkala-mrg.ru «Абонентдин хсуси кабинет» кардик ква. Ада абонентдиз онлайн-къайдада вичин лицевой счетдиз талукь делилриз килигдай, газ гьисабдиз къачузвай тадаракрин рекъемар агакьардай ва газдин гьакъи гунихъ галаз алакъалу гьахъ-гьисабар, кIваляй къецел экъечI тавуна, абонентвилин къуллугъдиз, кассайриз тефена ийидай мумкинвал гузва.
ГьакIни «Газпром межрегионгаз Махачкала» ООО-дин сайтда генеральный директор Р.Мурадован «Интернет-приёмный» ачухнава. Адан куьмекдалди компаниядин кьилиз суалар арада кас авачиз гудай мумкинвал ава. Теклифар, тIалабунар гьам газдин муьштерийривай, гьамни догазификациядин программадин иштиракчийривай рекье тваз жеда.
Арза ийизвай касдин къулайвал патал «Интернет-приёмныйда» асул месэлайрин ва суалрин классификатор, яни абур дестейриз пайзавай алат кардик кутунва: газламишун ва технологический галкIурунар, газдин гьахъ-гьисабар, кIвалин къене авай тадаракриз технический рекьяй къуллугъ авун, зегьметдин алакъаяр, производстводин хатасузвал, коллективдин этика ва икI мад. «Интернет-приёмныйдин» къуллугъ ишлемишун патал асантди я ва ада муьштеридихъ са гьихьтин ятIани махсус чирвилер хьун истемишзавач.
Чи мухбир
