И мукьвара Тулада 2001-2003-йисара дидедиз хьанвай рушарин арада кьезил атлетикадай Россиядин кIвенкIвечивал патал турнир кьиле фена. Ана РД-дин хкянавай командадик кваз Ахцегь райондин 2-нумрадин ДЮСШ-дин векил Карина Палчаевади иштиракна. Рушан тренер кьезил атлетикадай СССР-дин спортдин мастер Абдурагьим Палчаев я.
Турнирдиз уьлкведин са шумуд региондай командаяр атанвай. Къизгъин акъажунрин нетижада эстафетада Карина Палчаевади, 100 метрдиз 50,18 секундда зверуналди, чи республикадин дережадин рекорд эцигна. Лугьун лазим я хьи, ихьтин нетижа 1980-йисалай инихъ цIийи хъувунвачир.
Идалайни гъейри, Карина Палчаева и акъажунра кьилди 100 ва 200 метрийрин мензилриз зверунайни тафаватлу хьана. Чаз адахъ мадни еке агалкьунар хьана кIанзава.
Рагьидин Эминов
Куьрелди
Дагъустанда сифте яз паратхэквондодай Россиядин чемпионат кьиле фидайдакай хабар гузва регионда спортдин и жуьредай федерациядин регьбер Руслан Биярсланова.
“Анжида” къугъвазвай Аргентинадин полузащитник Хуан Лескано къазахрин “Тоболдиз” хъфизва. Ина ам арендадин ихтиярралди къугъвада. 2017/2018 — йисарин сезонда “Анжидик” кваз Лесканоди 19 матчда иштиракна ва вад туп яна.
Махачкъалада, Ленинан Комсомолдин тIварунихъ галай ял ядай багъда авай Олимпиададин баркалладин Аллея цIийи хъувунва.
Виликрай галереяда Олимпиададин къугъунрин 11 чемпиондин ва вад сеферда дуьньядин чемпион Али Алиеван суьретар авай. Гила аник Олимпиададин къугъунра тафаватлу хьайи мад кIуьдан шикилар ахкатнава. Ана авай шикиларни цIийи хъувунва ва Аллея алай аямдин жуьреда туькIуьрнава.
Азаддиз кьуршахар кьунай Япониядин хкягъай командадин векилри чпин кIелунни-тренировкайрин сборар Махачкъалада тухузва. Абурун арада Олимпиададин къугъунрин медалистарни ава. Пагьливанри азаддиз кьуршахар кьунай чIехи акъажунриз гьазур хьун патал Дагъустан виридалайни хъсан чка яз гьисабзава. РикIел хкин, виликрай Дагъларин уьлкведиз Китайдин дишегьлийрин хкягъай командадин членар атанай.
