20-февралдиз республикадин регьбер Сергей Меликова РФ-дин Президентдин Къарарда къалурнавай серенжемар кьилиз акъудунин рекьяй РД-дин оперативный штабдин заседание кьиле тухвана.
Кьилин месэлайрикай сад икьрардин бинедаллаз РФ-дин Яракьлу Къуватрин жергейриз къуллугъдал ватандашар хкягъуниз талукь серенжемар кьилиз акъудуникай тир.
Сергей Меликова къейд авурвал, и барадай 19-февралдиз Грозныйда РФ-дин Хатасузвилин Советдин председателдин заместитель Дмитрий Медведеван регьбервилик кваз кьиле фейи совещанидални месэла къарагъарна.
«Яракьлу Къуватрин жергеяр ацIурунин карда СКФО-дин республикайрин роль къейдна, гьелбетда, — чи ватанэгьлийри кутунвай пайни: Россиядин 9 Игит дагъустанвияр я. Чпин буржи чешнелудаказ тамамарзавай гзаф кьадар офицерар, аскерар государстводин шабагьар гуналди къейдна», — лагьана С.Меликова.
И мукьвара телеф хьайи полковник Мегьамедали Мегьамеджановакайни рахана. Ам 18-армиядин командующийдин заместителдин къуллугъдал алай. 17-февралдиз ам хайиди тир Хъуьлуьдрин хуьре кучукна.
«Къе чна вири къуватар военный къуллугъчийрин хизанриз куьмек гунихъ элкъуьрзава. Мукьвал-мукьвал аскеррин багърийрихъ галаз гуьруьшмиш жезва, абурун тIалабунар кьилиз акъудиз алахъзава. СВО-да иштиракзавайбурун, абурун хизанрин тереф хуьнин макьсаддалди жемиятдин са шумуд тешкилат арадал гъанва. И гьерекатдин иштиракчияр гьукумдин вири органар я. РД-дин МВД-дин, прокуратурадин къуллугъчийрин, республикадин прокурордин, Халкьдин Собранидин депутатрин, Гьукуматдин Председателдин, РД-дин Госсекретардин аппаратдин алахъунар иллаки къейд ийиз кIанзава», — лагьана республикадин Кьили.
Ада РФ-дин Яракьлу Къуватра ватандашар икьрардин бинедаллаз къуллугъдал хкягъунин кIвалахар ерилудаказ тешкилун герек тирди рикIел хкана ва шегьерринни районрин кьилериз и месэла хсуси гуьзчивилик кутуниз эвер гана. «Гележег СВО-дин иштиракчийрилай аслу я», — РФ-дин Президент В.Путинан и гафар тикрарна С.Меликова.
Салим Салимов
