И мукьвара Москвада какахьай женгинин искусствойрай (ММА ориентал жуьредай) Россиядин 20 региондай тир 500-дав агакьна спортсменрин иштираквал аваз кьиле фейи уьлкведин чемпионатда Дагъустандин хкянавай командади инанмишвилелди 1-чка кьуна. ИкI, Россиядин чемпионатда чи спортсменри вири санлай 67 медаль къазанмишна (абурукай къизилдинбур – 44, гимишдинбур — 16 ва буьруьнждинбур – 7).
Шадвилелди мадни а кардикай хабар гуз кIанзава хьи, къизилдин медалар ва алай йисуз Индонезияда кьиле фидай дуьньядин чемпионатда иштиракдай мумкинвал къазанмишайбурун арада СтIал Сулейманан райондин «Сардархуьр» клубда чпин устадвал хкажзавай жегьиларни ава. Кьилди къачуртIа, Далгат Рагьимханова, Саид Шихнабиева, Селим Шихнабиева, Межведил Ибрагьимова ва Къадир Шайдабегова 1-чкаяр кьуна. Абуру дзюдодай ва самбодай ДЮСШ-дин тренер-муаллим Камил Абдурагьманован гъилик вердишвилер къачузва. Жегьилри агалкьунар идалай виликни са шумудра къазанмишна.
Рагнеда Рамалданова
