Чна алатай нумрайрани кхьейвал, Да­гъустан Республикадин регьберри Жемиятдин палатади (ОП) гьукумдин крар идара ийидай органрихъ галаз санал кIвалахунин дережа авайдалай хъсанарун истемишзава. Идаз талукь месэлаяр мукьвал-мукьвал веревирдни ийизва. ИкI тирдан гьакъиндай и йикъара РД-дин Гьукуматдин Председатель Абдулмуслим Абдулмуслимов Жемиятдин палатадин председатель Азизбег Черкесовахъ галаз гуьруьшмиш хьуни ва ОП-дин общественный советрин (ОС)  кIвалахдин менфятлувал хкажуникай чпин фикирар лугьуни успатзава.

Къейд авурвал, 2023-йисуз республикадин министерствойра  муниципалитетра кардик квай общественный советри 96 заседание, 206 мярекат тухвана. 2022-йисан нетижайрив гекъигайла, и рекъемар хейлин гзаф я.

Алай вахтунда ОС-дин къурулушдик 415 кас акатзава. Абурун арада гражданвилин обществодин векилар, жуьреба-жуь­ре хилерин ветеранар, аслу тушир экспер­тар ава. РД-дин Кьил Сергей Меликова къейд авурвал, сифте нубатдин везифа о­бщест­венный советрин активвал хкажун, талукь тир хилера государстводин сиясат уьмуьрдиз кечирмишдайла, гражданвилин общест­водин итижар фикирда кьун я.

А.Абдулмуслимова лагьайвал, общест­венный советрин вири кIвалах тарифлуди жезвач.

— Дагъустандин Жемиятдин палата ва общественный советар Дагъустандин обществода меслятвал таъминарзавай майданар я. Гьавиляй абурукай республикада сиясатдин, экономикадин, гражданвилин гьалар мадни пайгарбур авун патал менфят къачуна кIанда, — меслятна премьер-министрди.

Гуьруьшда РД-дин милли сиясатдин ва динрин крарин рекьяй министр Энрик Муслимовани иштиракзавай. Ада лагьайвал, общественный хейлин советрин «зайиф чка» ам я хьи, абуру чпи кьиле тухузвай крарикай малуматар тIимил гузва. Абурухъ галаз алакъалу жедай информацияни авач.

— Гьукумдин органрин официальный­ бязи сайтра общественный советрин кIва­лах­дикай гузвай малуматар тамамбур, гьакIни къенин йикъаз талукьбур жезвач, — къейдна Э.Муслимова. — Авайвал лагьайтIа, общественный советри сайтда чпин положение, советдик акатзавай инсанрин фамилияр ганва, мад са жуьредин малуматни авач. Чпин кIвалахдин планрикай, кьиле тухвай мярекатрикай, заседанийрал гьялай ва агьалийри къарагъарзавай месэлайрикай информация ерли гузвач. И жигьетдай абурувай республикадин бязи министерствойрин ва ведомствойрин общественный советри сайтрикай агьалияр ва гьукумдин органар хабардар авун патал тухузвай кIвалахдилай чешне къачуз жеда.

Общественный советрин кIвалахдиз талукь мониторинг кьиле тухвайла, малум хьана хьи, чпин кIвалах лап хъсандиз тешкилнавайбурук РД-дин культурадин, зегьметдин ва яшайишдин рекьяй вилик финин, милли сиясатдин ва динрин крарин рекьяй, спортдин министерствойрин советар акатзава.

ОП-дин председатель Азизбег Черкесова малумарайвал, алай вахтунда республикадин гьукумдин крар идара ийидай органра кардик квай общественный советри РД-дин Жемиятдин палатадихъ галаз санал кIвалахунихъ еке метлеб ава.

— Чи кIвалахдин дережа ва менфятлувал хкажун патал республикадин ОП-дин ва ОС-рин кIвалахдиз талукь координационный орган тешкилун лазим я, — лагьана А.Черкесова. — Адан куьмекдалди респуб­ликада арадал къвезвай жемиятдинни сиясатдин гьалар ахтармишда, герек малуматар гуда ва серенжемар кьабулда.

Хийир Эмиров