Дагъустанда уьлкведа виридалайни чIехибурукай сад тир гарун электростанция пайда жеда. РД-дин энергетикадин ва тарифрин министерстводин пресс-къуллугъди хабар гузвайвал, цIийи проект Дагъустанди «НоваВинд» АО-дихъ галаз кутIунай икьрардин бинедаллаз эцигда.
Къейд ийин хьи, гарун электростанция Новолак ва Къумторкъала районрин мулкарал эцигдайвал я. Чешмедин делилралди, эцигунрин кIвалахрал 300-далай виниз пешекарар желбда. Объект 2026-йисуз ишлемишиз вахкун фикирда кьунва. Проект кьилиз акъудунин нетижада кIвалахдай цIийи 60 чка арадал къведа.
Министерстводин пресс-къуллугъдин малуматралди, эцигунрин кIвалахар кьве патал пайнава. ИкI, 2025-йисан июндалди 160 МВт гужлувал авай генерациядин, электросетрин ва са жерге маса объектар эцигда, гарун электростанция электричестводин сетрик кутада. Кьвед лагьай пай 2026-йисан июндалди давам жеда. И чIавалди 315 МВт гужлувал авай генерациядин маса объект эцигна акьалтIарда.
Чи мухбир
