Гьуьрметлу дустар! Ватанэгьлияр!
Милли газет кIелзавайбур, дуьньядин кьуд пата авай жуванбур!
Къацу Тарцин Аждагьандин йис вичин вахт гьисабунив гатIуннава. Адак гьар сада хъсан умудар кутунва. Россиядин Федерациядин Президент Владимир Путина 2024-йис Хизандин йис яз малумарнава. Им чи уьлкведа хизан, милли адетар, ахлакь, марифат хуьниз, абур мадни еримлу авуниз, хизандин дережа хкажуниз къуват гузва лагьай чIал я.
Гьа са вахтунда Дагъустан Республикадин Кьил Сергей Меликова цIийи йис Дагъустандин халкьдин шаир, ХХ асирдин Гомер СтIал Сулейманан юбилейдин йис яз кьиле тухун теклифнава. Имни пара важиблу, лишанлу, акьалтзавай несилдиз СтIал Сулейманан бажарагъдикай, алакьунрикай, машгьурвиликай чирдай вакъиа я.
2023-йис тарихдиз фена. Алукьнавай йисуз дердер-гъамар, тIалар-квалар, бедбахтвилер, дявеярни къалмакъалар, мусибатар чавай яргъаз хьурай! ЦIийи йис чаз гьар са макъамда хъсан хабарри, муштулухри, шад мярекатри, къени крари, фикирри мадни еке агалкьунар къазанмишун патал руьгьламишдайди хьурай!
ЦIийи йиса чаз къени фикирар, хъсан крар, важиблу гзаф вакъиаяр багъишрай! Йисан вири вахтунда чи халкьдин гьар са векил гьевесдин, къенивилин, бахтунин, бегьерлувилин шивцел алаз хьурай! Гъиле кьазвай гьар са кар агалкьунралди кьилиз акъуддай къуватар гурай, чун анжах гъалибвилери къаршиламишрай. Къазанмишзавай гъалибвилер, намуслу, гьакъисагъ зегьметдин бегьерар гьар сада дамахдайбур, чешне къачудайбур хьурай! Гьа са вахтунда чахъ зегьметдин баркаллу нетижайрал кьарувалдай, шадвалдай, гьевесдивди ял ядай вахтар, мумкинвилерни хьурай!
ЦIийи йис чи ватандашар патал хазинадин берекатлу сандухдиз элкъуьрай! Ам девлетрив, бахтарив ацIурай. Къуй и йис чун патал акьван гуьзелди, еке агалкьунринди, шад хабарринди, суьгьуьрдинди хьурай хьи, хейлин вахтар алатайлани, ам хушвилелди рикIел хкидайвал, жуванбуруз адакай хуш суьгьбетар ийидайвал.
Къуй чахъ, чи халкьдихъ рикIе авай мурадар, гъиле кьазвай баркаллу крар кьилиз акъуддай сагъламвал, къуватарни мумкинвилер, хизанра чимивал, кIанивал, шадвал, дуствал артух ва мягькем, гьар са ватанэгьлидин бахтар ачух хьурай! Сада-садаз ийизвай хъсанвилерин, галайвилерин, куьмекрин кьадар цIуд, виш сеферда виниз акъатрай! Ийизвай крар вирида дамахдайбур хьурай!
Къуй гьар садан рикIиз ЦIийи йиса экуьвал, регьимлувал, къенивал, мергьяматлувал, жумартвал, шадвал, кIанивал гъурай! Дуьнья ислягь хьурай! Сагърай чи халкь! Мубаракрай ЦIийи йис!
«Лезги газетдин» редакциядин коллектив
