Гьар са йис акъатдайла, лезги спортсменри спортдин кесерлу майданра къазанмишнавай гъалибвилер фикирда кьуналди, виридалайни тафаватлу хьайи 10 касдин тIварар раиж авун чаз фадлай адетдиз элкъвенва. Хиве кьан, им регьят кар туш. ГьикI хьи, ацалтзавай вири четинвилеризни дурум гана, чпин устадвал ва алакьунар вини дережада аваз къалурзавай, агалкьунар къазанмишзавай чи ватанэгьлийрин кьадар гзаф я. Абуру, чи уьлкведин хьиз, дуьньядин спортдин кьакьан кукIушар муьтIуьгъаруналдини, чун шадарна. Чна абуруз гьар садаз — гьам спортдин рекье сифте камар къачунвай жаванриз, гьамни уьлкведин, дуьньядин кесерлу майданра иштиракзавай зурба спортсменриз — чи халкьдин милли руьгь ва тIвар хкажзавай гьар садаз рикIин сидкьидай сагърай лугьузва. Къуй алукьнавай ЦIийи йисуз абурун кьадар артух, дережаяр мадни кьакьан,  дуьнья ислягь, спортдин майданарни ачух хьурай!