Алай вахтунда дуьньяда залан гьихьтин гьерекатар аватIа, чаз виридаз аквазва. Алатай асирда пара инсанар Дуьньядин кьвед лагьай дяведи телефна. Гила аквазвайвал, мадни гзаф рекьизва. СССР себеб яз, дуьньядин халкьар ислягьвилелди яшамиш хьана. Дугъриданни, СССР ислягьвилин даях тир. Ам чкIайдалай кьулухъ дуьньядин гьар са пипIе цIай, ялав гьатна. Гьа ялав чахъни галукьна.

РагъакIидай патан ампайриз­ Россияни чукIуриз кIанзава. И кар патал нацистрин Украина яракь­ламишзава. Америкадин гос­секретарь хьайи Мадлен Олбрайта вичин вахтунда­ лагьанай: «Вучиз икьван девлетлу гьар са шей авай чилер­, чуьл­лер, тамар, къизилдин, наф­тIа­дин, газдин мяденар Россиядив гва? Абурук чи пайни хьана кIанзавайди я». Ихьтин фикирар авай душманри чи жегьиларни рекьяй акъудзава. Махачкъаладин аэропортуна хьайи вакъиайрикни гьабурун гъил ква. Исятда Украинада кьиле физвай махсус серенжемда вири регионрай  кьегьал рухвайри уьтквемвилелди женг чIугвазва, гьа барадай яз — да­гъустанвийрини. Баркалла чпиз! Телеф хьайибуруз рагьмет хьурай. Женг чIугвазвай кьегьалриз Аллагь вич куьмек хьурай.

Чун уях хьана кIанда. Патанбурун таблигъатдин чIалахъ тежен.  Виридалайни багьа, хъсан я чаз жув хайи, жува фу незвай, яд хъвазвай, жув яшамиш жезвай, зегьмет чIугвазвай Ватан. Ам хуьн, виликди тухун чи буржи я.

Россия хьтин маса уьлкве авайди туш. ГьакI хьайила, ша чна вирида, гъил-гъиле кьуна, зун–вун талгьана, вири къуватар сад авуна, Россиядин тIвар мадни виниз акъудин.

Шихали Багъиров